काठमाडौं । जिल्ला प्रहरी कार्यालय रुपन्देहीले साउन महिनामा जिल्लाभर १ सय ८८ वटा मुद्दा दर्ता गरी अनुसन्धान अघि बढाएको छ ।
प्रहरीले सार्वजनिक गरेको मासिक प्रगति विवरणअनुसार सो अवधिमा चालु मुद्दाका १सय ५९ जना प्रतिवादी पक्राउ परेका छन् भने अदालतको फैसला कार्यान्वयनअन्तर्गत ४९ जना फरार प्रतिवादी पक्राउ परेका छन् । फरार प्रतिवादीबाट १२ वर्ष ६ महिना ११ दिन कैद सजाय कार्यान्वयन गराउनुका साथै १७ लाख ९१ हजार ३सय ५० जरिवाना असुल गरिएको जिल्ला प्रहरी कार्यालय रुपन्देहीले जनाएको छ । साउनमा दर्ता भएका मुद्दामध्ये ज्यानसम्बन्धी ३५, संगठित तथा आर्थिक अपराधसम्बन्धी ८१, आत्महत्यासम्बन्धी २६, सामाजिक अपराधसम्बन्धी १२, चोरीसम्बन्धी छ र सवारी दुर्घटनासम्बन्धी छ वटा रहेका छन् ।
प्रहरीले भन्सार छली नियन्त्रण अभियानअन्तर्गत २ करोड २५ लाख ४४ हजार ६सय ५६ मूल्य बराबरका अवैध सामान बरामद गरेको छ । सो क्रममा १० जना र १८ वटा सवारीसाधन नियन्त्रणमा लिइएको प्रहरीले जनाएको छ । साउनमा लागुऔषध सम्बन्धी १८ वटा मुद्दा दर्ता भएका छन् । ती मुद्दामा २५ जना पक्राउ परेका छन् । प्रहरीले उनीहरुको साथबाट १४ किलो ३ सय ६८ ग्राम गाँजा, ३३ ग्राम २ सय ५८ मिलिग्राम ब्राउन सुगर, २ सय १० ग्राम चरेस तथा विभिन्न प्रकारका ५ सय ५६ थान सुई तथा ट्याब्लेट बरामद गरेको जनाएको छ । हातहतियारतर्फ बुटवलबाट रिभल्भर र गोलीसहित एक जना पक्राउ परेका छन् । यस्तै, भैरहवामा प्रहरीको घुमुवा बनेर नक्कली रिभल्भर देखाउँदै रकम असुल्ने एक जना पक्राउ परेको प्रहरीले जनाएको छ ।
शुद्धोधनमा सुनको सिक्री खोस्ने समूहलाई स्कार्पियोसहित बेलहियाबाट नियन्त्रणमा लिइएको तथा अवैध भीओआईपी कल बाइपास सञ्चालन गर्ने एक जनालाई विभिन्न उपकरण र सिमकार्डसहित पक्राउ गरिएको विवरणमा उल्लेख छ । सिद्धार्थनगर नगरपालिका–१२ बाट ५ सय दरका १ सय ४० थान, अर्थात् ७० हजार रुपैयाँ बराबरका भारतीय नक्कली नोटसहित दुई जना भारतीय नागरिकसमेत पक्राउ परेका छन् ।महिला तथा बालबालिकासम्बन्धी घटनामा साउन महिनामा घरेलु हिंसाका ८५ वटा उजुरी परेकोमा ५० वटा उजुरी मिलापत्रमार्फत टुंग्याइएको प्रहरीले जनाएको छ । स्थानीय तहगत रूपमा सबैभन्दा बढी घरेलु हिंसाका उजुरी बुटवल उपमहानगरपालिकामा १९ र सिद्धार्थनगर नगरपालिकामा १७ वटा परेका छन् ।
सो अवधिमा १ सय १७ जना महिला, पुरुष तथा बालबालिका हराएकोमा प्रहरीको सक्रियतामा ५८ जना फेला परेका छन् । रुपन्देहीमा साउन महिनामा १ सय ५९ वटा सवारी दुर्घटना भएका छन् । दुर्घटनामा पाँच जनाको मृत्यु भएको छ भने २१३ जना घाइते भएका छन् । ट्राफिक नियम उल्लंघन गर्ने ३ हजार ३ सय २६ वटा सवारीसाधनलाई कारबाही गरिएको छ । कारबाहीबाट ५७ लाख ९९ हजार रुपैयाँ राजस्व संकलन भएको जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक कृष्णकुमार चन्दले जानकारी दिए । चन्दले अपराध नियन्त्रण, फरार अभियुक्त पक्राउ, अवैध भन्सार छली नियन्त्रण, लागुऔषध नियन्त्रण तथा ट्राफिक व्यवस्थापनलाई प्राथमिकतामा राखेर जिल्लाभर सुरक्षा गतिविधि सञ्चालन गरिएको जनाए ।
