काठमाडौँ ।मध्य इन्डोनेसियामा मंगलबार ६.७ म्याग्निच्युडको शक्तिशाली भूकम्प गएको छ। अमेरिकी भूगर्भीय सर्वेक्षणका अनुसार भूकम्प मध्य सुलावेसी प्रान्तको पालु सहरभन्दा दक्षिण–पूर्वमा बिहान १०:२७ बजे गएको हो। भूकम्पको झड्का तीव्र भए पनि हालसम्म मानवीय क्षति वा ठूलो भौतिक क्षतिको विवरण प्राप्त भएको छैन।
इन्डोनेसियाको मौसम विज्ञान, जलवायु विज्ञान तथा भूभौतिकी एजेन्सीले पालु र सिगी क्षेत्रमा भूकम्प स्पष्ट रूपमा महसुस गरिएको जनाएको छ। भूकम्पपछि तटीय क्षेत्रका बासिन्दा केही समय त्रसित बने पनि सुनामीको कुनै खतरा नरहेको स्पष्ट पारिएको छ। इन्डोनेसिया प्रशान्त महासागरको ‘रिङ अफ फायर’ क्षेत्रमा पर्ने भएकाले यहाँ बारम्बार भूकम्प र ज्वालामुखी गतिविधि हुने गर्छ। यसअघि सन् २०१८ मा पालु क्षेत्रमा आएको ७.५ म्याग्निच्युडको विनाशकारी भूकम्प र सुनामीले ठूलो जनधनको क्षति पुर्याएको थियो। यस पटक भने कुनै ठूलो क्षति नभएको जानकारीसँगै स्थानीयवासीले राहतको अनुभव गरेका छन्।
