काठमाडौँ । मुसलधारे वर्षाका कारण १३२ भन्दा बढीको मृत्यु भएपछि दक्षिण एशियाली राष्ट्र श्रीलङ्कामा आपतकाल घोषणा गरिएको छ । राष्ट्रपति अनुराकुमार दिसानायकले खराब मौसमी प्रकोपको सामना गरिरहेको अवस्थामा सार्वजनिक आपतकालको घोषणा गरेका हुन् । यो घोषणाले सार्वजनिक सुरक्षा अध्यादेश अन्तर्गत आपतकालीन नियमहरू राष्ट्रव्यापी लागू गर्न सरकारलाई अधिकार प्रदान गर्छ ।
आपतकाल घोषणा गर्नुको उद्देश्य सार्वजनिक सुरक्षाको रक्षा गर्नु, राष्ट्रिय स्थिरता कायम राख्नु रहेको उल्लेख छ । श्रीलङ्का चक्रवात दित्वाहबाट प्रभावित भएकोमा १३२ जनाभन्दा धेरैको मृत्यु भएको छ । त्यहाँ झन्डै २ सयभन्दा बढी बेपत्ता रहेको विपद् क्षेत्रका अधिकारीहरूले बताएका छन् । श्रीलंका सरकारले विदेशमा रहेका आफ्ना नागरिकहरुलाई स्वदेश पैसा पठाउन आह्वान गरेको छ । श्रीलंकामा पछिल्ला आठ वर्षमा आएको सबैभन्दा ठूलो प्राकृतिक विपत्ति हो । यसअघि २०१७ मा आएको बाढी–पहिरोमा परी २०० जनाको मृत्यु भएको थियो भने लाखौं मानिस बेघर भएका थिए ।
श्रीलंका विपद् व्यवस्थापन विभागका अनुसार पछिल्लो प्राकृत्तिक विपत्तिमा १५ हजारभन्दा बढी घर नष्ट भएका छन् भने ७८ हजार मानिसलाई सरकारी अस्थायी शिविरहरूमा राखिएको छ ।श्रीलंकाका प्रधानमन्त्री हारिनी अमारासूर्या कोलम्बोमा रहेका विभिन्न देशका राजदूतहरुसँग भेट्दै उनीहरूलाई देशको गम्भिर अवस्थाबारे जानकारी गराइरहेका छन् र सहयोग गर्न आग्रह गरिरहेका छन् ।
अधिकारीहरूका अनुसार श्रीलंकाको एक तिहाइ भूभागमा न त बत्ती छ, न त शुद्ध पानी छ ।पानी शुद्धीकरण केन्द्रहरू समेत बाढी र डुबानबाट प्रभावित भएका छन् । धेरै क्षेत्रमा इन्टरनेट सेवा पनि अवरुद्ध भएको छ । श्रीलंकामा परेको विपत्तीमा भारतले सहयोग सामग्री पठाएको छ । दुईवटा विमान राहत सामग्री लिएर त्यहाँ पुगेका छन् भने पहिले नै कोलम्बोमा रहेको एउटा भारतीय जहाजले आफ्ना खाद्यान्न प्रभावित क्षेत्रमा उपलब्ध गराएको छ ।उष्णकटिबंधीय आँधीबेहरीका कारण श्रीलंकासहित इन्डोनेसिया, मलेशिया र थाइल्याण्डमा भीषण बाढी र पहिरो आएको छ । जसका कारण त्यसक्षेत्रमा लाखौं मानिसहरू प्रभावित भएका बीबीसीले जनाएको छ ।
त्यस्तै इन्डोनेसियाली टापु सुमात्रामा ठूलो वर्षा भएको थियो । त्यहाँ बाढी र पहिरोमा परी ज्यान गुमाउनेको सङ्ख्या १ सय ६४ पुग्नुका साथै ७९ जना बेपत्ता भएका छन् ।वर्षापछि आएको बाढीले धेरै घर डुवाएको छ भने कयौं घरहरु भत्काएको छ । मलेशियामा पनि धेरै जनाको ज्यान गएको अनुमान गरिएको छ । जलवायु परिवर्तनले आँधीबेहरीको ढाँचामा परिवर्तन ल्याएको छ । जसमा मौसमको तीव्रता र अवधि समावेश भएकाले ठूलो वर्षा, अचानक बाढी र तीव्र हावा चलेको अधिकारीहरुले बताएका छन् ।
