जुबा– दक्षिण सुडानमा झन्डै १३ लाख बालबालिकाहरु कुपोषणको उच्च जोखिममा रहेको संयुक्त राष्ट्रसंघीय निकायले शुक्रबार जनाएको छ । संयुक्त राष्ट्रसंघअन्तर्गतको युनिसेफले पाँच वर्षमुनिका १३ लाख बालबालिका कुपोषणको उच्च जोखिममा रहेको तथ्यांक सार्वजनिक गरेको हो ।
‘कुपोषणको जोखिममा रहेका बालबालिकाहरुलाई स्तनपानको आवश्यकता देखिएको छ । त्यसैगरी अन्य पौष्टिक तत्त्वहरु पनि उनीहरुलाई पर्याप्त उपलब्ध गराउनुपर्ने खाँचो छ,’ युनिसेफका एक अधिकारीले भने ।
दक्षिण सुडानका लागि युनिसेफका प्रतिनिधि मोहम्मद एग एयोयाले जुवाबाट जारी गरेको वक्तव्यमा कुपोषणको जोखिममा रहेका बालबालिकाहरुलाई सहयोगको आवश्यकता रहेकोमा जोड दिएको छ ।
बालबालिकाहरुलाई अत्यावश्यक न्युनतम स्तनपानका लागि आमाहरुलाई सहयोग गर्न पनि युनिसेफले सबैलाई आग्रह गरेको छ ।– रासस
