काठमाडौं । । अमेरिकी राष्ट्रपति डोनाल्ड ट्रम्पले संयुक्त राष्ट्रसंघको महासभालाई सम्बोधन गर्दै इरानसँगको विवाद समाधानका लागि वार्ता वा थप सैन्य कदममध्ये कुनै एक विकल्प रोज्नुपर्ने अवस्था रहेको बताएका छन्।
मंगलबार न्युयोर्कमा भएको महासभाको बैठकमा बोल्दै ट्रम्पले इरानसँग सहमति हुन नसके कडा कदम चाल्न सक्ने चेतावनी दिएका हुन्। उनले इरानको आणविक कार्यक्रमलाई लिएर अमेरिकी चासो दोहोर्याउँदै आवश्यक परे सैन्य विकल्प पनि खुला रहेको संकेत गरे। उनको सम्बोधनकै दिन अमेरिका र इरानका प्रतिनिधिबीच उच्चस्तरीय भेटवार्ता पनि भएको थियो। यसले दुई देशबीच तनाव कायम रहे पनि कूटनीतिक माध्यमबाट समाधान खोज्ने प्रयास जारी रहेको देखाएको छ। सम्बोधनका क्रममा ट्रम्पले रुस–युक्रेन युद्ध अन्त्यका लागि पहल गर्ने, विश्वव्यापी सरकारको अवधारणाको विरोध गर्ने तथा कृत्रिम बौद्धिकताको क्षेत्रमा अमेरिका अग्रस्थानमा रहने विषयमा पनि धारणा राखेका थिए।
