काठमाडौँ। मधेश प्रदेशमा करिब १६ प्रतिशत बालबालिका कुपोषण तथा शीघ्र कुपोषणको समस्याबाट प्रभावित रहेको तथ्याङ्क सार्वजनिक भएको छ।
अशोक भण्डारीका अनुसार अभियानमार्फत गरिएको पोषण परीक्षणबाट उक्त अवस्था उजागर भएको हो। स्वास्थ्य निर्देशनालय मधेश प्रदेशले प्रदेशका १३६ स्थानीय तहमध्ये १३३ स्थानीय तहमा सञ्चालन गरेको परीक्षण अभियानमा दुई लाख ८३ हजार ३०८ बालबालिकाको स्वास्थ्य अवस्था मूल्याङ्कन गरिएको थियो। परीक्षणको नतिजाअनुसार ३५ हजार ८८३ जना बालबालिका कुपोषित, आठ हजार ७७१ जना शीघ्र कुपोषित तथा दुई लाख ३३ हजार १८२ जना सामान्य अवस्थामा रहेका छन्। यस आधारमा कुपोषित र शीघ्र कुपोषित बालबालिकाको कुल सङ्ख्या ४४ हजार ६५४ पुगेको छ, जुन परीक्षण गरिएका बालबालिकामध्ये १५.७६ प्रतिशत हो।
कृष्णप्रसाद यादवले गरिबी, अशिक्षा, पोषणसम्बन्धी चेतनाको कमी, सरसफाइको अभाव र असन्तुलित खानपानका कारण प्रदेशमा कुपोषणको समस्या गम्भीर बन्दै गएको बताए। त्यस्तै, डा. प्रमोद यादवले कृषि उत्पादनका हिसाबले समृद्ध मानिने प्रदेशमा बाल कुपोषणको उच्च दर देखिनु चिन्ताजनक विषय भएको उल्लेख गरे। तथ्याङ्कअनुसार नेपालका करिब २९ प्रतिशत बालबालिका मधेश प्रदेशमा जन्मिने गरेका छन् भने देशको कुल जनसङ्ख्याको झण्डै २२ प्रतिशत हिस्सा यही प्रदेशमा बसोबास गर्छ। स्वास्थ्य विज्ञहरूले विश्व स्वास्थ्य सङ्गठनको मापदण्डअनुसार यो अवस्थालाई गम्भीर चुनौतीका रूपमा लिनुपर्ने बताएका छन्।
