काठमाडौँ । नेपालको शैक्षिक परामर्शको क्षेत्रमा सबैभन्दा जेठो संघ नेपाल शैक्षिक परामर्श संघ (इक्यान) ले आज २९ औँ वार्षिकोत्सव मनाउँदै छ। आज एक औपचारिक कार्यक्रम आयोजना गर्दै संस्थाले भव्य रूपमा स्थापना दिवस मनाउन लागेको इक्यानले जनाएको छ ।
उच्च शिक्षाका लागि विदेश अध्ययन गर्न चाहने विद्यार्थीहरूलाई विश्वसनीय र गुणस्तरीय परामर्श सेवा प्रदान गर्दै आइरहेका शैक्षिक कन्सल्टेन्सीहरूको छाता संगठनका रूपमा इक्यानले विगत २८ वर्षदेखि महत्वपूर्ण भूमिका निर्वाह गर्दै आएको छ । इक्यानका अध्यक्ष शेषराज भट्टराईले स्थापना दिवसको अवसरमा सम्पूर्ण सदस्यहरू, शिक्षाविद्हरू, विदेशी विश्वविद्यालयका प्रतिनिधिहरू, सरकारी अधिकारीहरू र सम्बन्धित सबैमा हार्दिक आभार तथा शुभकामना व्यक्त गरेका छन् । उनले इक्यानले शैक्षिक परामर्शको क्षेत्रमा नैतिकता, पारदर्शिता र गुणस्तर कायम राख्न निरन्तर प्रयास गर्दै आएको बताए ।
२९ औँ वार्षिकोत्सव कार्यक्रममा शैक्षिक परामर्श क्षेत्रका चुनौती र अवसरहरूबारे छलफल गरिनुका साथै आगामी दिनमा यस क्षेत्रलाई थप मर्यादित र प्रभावकारी बनाउने विषयमा विचारविमर्श गरिने अपेक्षा गरिएको छ । इक्यान केन्द्रसँगै यसका विभिन्न शाखाहरूले पनि देशभरि विविध कार्यक्रमहरू आयोजना गरी स्थापना दिवस मनाइरहेका छन् । यी कार्यक्रमहरूले शैक्षिक परामर्शको महत्व र यस क्षेत्रमा इक्यानले पुर्याएको योगदानलाई उजागर गर्न मद्दत पुर्याउने विश्वास लिइएको छ । अध्यक्ष भट्टराईले भविष्यमा पनि विद्यार्थीहरूको उज्ज्वल भविष्यका लागि सही मार्गदर्शन प्रदान गर्न इक्यान प्रतिबद्ध रहने कुरामा जोड दिए ।
