काठमाडौं — आज विश्व मुटु दिवस विश्वभर बिसभन्न कार्यक्रम गरी मनाईँदै छ। विश्व मुटु फेडेरेशन र विश्व स्वास्थ्य संगठनले सन् २००० देखि सेप्टेम्बरको अन्तिम आईतवारलाई विश्व मुटु दिवसका रुपमा मनाउन थालेपनि सन् २०१२ देखि सेप्टेम्बर २९ लाई विश्व मुटु दिवसका रुपमा मनाउने गरिएको छ।
नेपाल लगायत विकासोन्मुख देशहरुमा मुटुरोगीको संख्या दिन प्रतिदिन बढ्दै गएको छ। बिभिन्न थरीका मुटु सम्बन्धी रोगका कारण विश्वमा हरेका वर्ष १७ लाख भन्दा बढिको मृत्यु हुने गरेको छ। तर नेपालमा भने अहिले झण्डै २६ लाख मानिसमा कुनै न कुनै प्रकारको मुटु रोग पाइएको छ। चिकित्सकहरुका अनुसार धुमपान तथा मध्यपान सेवन नगर्ने, चिल्लो, पिरो बोसो, भुटेका तारेका खानेकुरा नखाने, सकभर मासु कम खाने, सागपात खाने र दैनिक शारिरीक व्यायम गर्ने हो भने मुटु रोगबाट बच्न सकिन्छ।
यसरी जोगाउँन सकिन्छ मुटु
खानपानमा ध्यान नदिँदा र नजान्दा धेरै किसिमका रोगहरु लाग्ने गरेका छन्। केही रोग वंशाणुतरुपमा पनि तपाईको शरीरमा आएको हुन्छ तर खानपानले त्यसलाई नियन्त्रण गर्न सकिन्छ। शरीरलाई स्वस्थ राख्नको लागि शारिरीक परिश्रमसहित खानपानको विशेष भूमिका हुने हुँदा ध्यान दिनु पर्ने हुन्छ।
पछिल्लो समय व्यस्त जीवनशैली, शारिरीक परिश्रमको अभाव, खानपानका कारण मानिसहरु रोगी बन्दै गएको चिकित्सकहरु बताउँछन्। त्यसका लागि शरीरलाई आवश्यक क्यालोरि मिलाएर खाएको खण्डमा अनेक खालको रोगका समस्यालाई कम गर्न सकिन्छ।
यदि स्वस्थ रहने हो भने खानालाई सन्तुलित गर्न सक्नु पर्दछ। त्यसैगरी खानालाई सन्तुलित र नियमित रुपमा व्यायाम गर्न सकियो भने मात्र पनि धेरै किसीमका रोगहरुबाट हामिले मुक्ति पाउन सक्दछौँ। हर्ट अट्याक, सुगर लगायतका समस्या समाधानमा खानपानको समेतत विशेष भूमिका रहेको हुन्छ।
बिहान–बेलुकाको खानामा हरियो साग हुनु अत्यन्त लाभदायी हुन्छ। दैनिक कम्तीमा एकपटक फलफूल खानुपर्छ। बेलुकाको खानामा दुईदेखि तीनवटा सुक्खा गहुँको रोटी, साग र मौसमी तरकारी हुनुपर्छ।
बेलुका ८ बजेभित्र खाना खाइसक्नुपर्छ। बिहान एक छाक मात्र भात खाने गर्नुपर्छ। धेरै शारीरिक श्रम गर्नेले धेरै र थोरै गर्नेले थोरै नै खानुपर्छ। बेलुकाको खाना खाएपछि तुरुन्त सुत्नु हुँदैन। कम्तीमा दुई घन्टापछि मात्र सुत्नुपर्छ। त्यस्तै खानाका साथमा पानीको मात्रापनि बढाउन जरुरी छ। धेरै समस्याहरु पर्याप्त पानी पिउनाले पनि समाधान हुन्छ।शाकाहारी हुनु मुटुका लागि फाइदाजनक छ। तर, नियन्त्रित रूपमा माछा–मासु खाए पनि हानि भने हुँदैन।
माछा र कुखुराको मासुले कोलेस्ट्रोल कम बढाउँछ। माछा–मासु बिहान र दिउँसोको खानामा मात्र प्रयोग गर्नुपर्छ। बेलुका माछा नखानु उत्तम हुन्छ। दैनिक तीनदेखि पाँच ग्रामभन्दा बढी नुन प्रयोग गर्नु हुँदैन। फाइबरयुक्त खानाहरू गहुँ गेडागुडी, हरियो सागपात खानुपर्छ। गेडागुडीलाई अंकुरित रूपमा खानु अझ बढी लाभदायक हुन्छ।
फापर, कोदो, जौ, मकै आदिले पनि मुटुलाई फाइदा गर्छ। घ्यु, तेल तथा अन्य चिल्लोको मात्रा जति सक्यो कम प्रयोग गर्नुपर्छ। खाना पकाउन शुद्ध तोरीको तेल नै सबैभन्दा उत्तम हुन्छ। बजारमा पाइने विभिन्न तेलहरुको प्रयोगमा ख्याल गर्न जरुरी हुन्छ। बेलुकाको खानामा काँचो लसुन खाँदा राम्रो हुन्छ। यसले रगतको कोलेस्ट्रोल घटाउँछ, साथै एस्पिरिनले जस्तै रगतलाई पातलो पार्दछ। मधुमेह रोग भएकाहरूले गुलियो खानु हुँदैन।
