इलाम, ३० पुस – चिकित्सा शिक्षा अभियन्ता प्रा.डा. गोविन्द केसीको स्वास्थ्य अवस्था जटिल बनेपछि जिल्ला अस्पताल इलाममा भर्ना गरिएको छ।
१६औँ पटकको आमरण अनशनको छैटौँ दिन सोमबार डा. केसीको स्वास्थ्य स्थिति गम्भीर भएपछि अस्पतालमा भर्ना गरिएको हो।
चिकित्सा शिक्षामा सुधारको माग गर्दै इलाममा आमरण अनशनमा बसिरहेका केसीको स्वास्थ्यमा दोश्रो दिनदेखि नै बिग्रिँदै गएको थियो।
डा. केसीको रक्तचाप बढेको छ। केसीका सहयोगी डा. अभिषेकराज सिंहका अनुसार फोक्सोमा सङ्क्रमण बढ्दै गएको र मुटुको गति अनियमित भएर शिथिल भएपछि अस्पताल भर्ना गरिएको हो। अस्पताल भर्ना गरिएपनि केसीले औषधि लिन मानेका छैनन्।
केसीको पक्षका वार्ताटोली सदस्य एवं वरिष्ठ अभिवक्ता सुरेन्द्र भण्डारीका अनुसार केसीको अवस्था नाजुक बन्दा पनि सरकारले वार्ताका लागि आवश्यक पहलकदमी लिएको छैन।
डा. केसी चिकित्सा शिक्षा विधेयक जनताका पक्षमा हुनुपर्ने, १५औँ सत्याग्रहका क्रममा सरकारले गरेको सहमति कार्यान्वयन हुनु पर्नेसहितका ६ बुँदे माग राखेर इलाममा यही पुस २५ गतेदखि आमरण अनशनमा बसिरहेका छन्।
