काडमाडौँ । घरमा अन्य सबै कुरा सामान्य हुँदाहुँदै पनि पति–पत्नीबीच बारम्बार विवाद र मनमुटाव भइरहेमा त्यसको एक कारण सुत्ने कोठा (बेडरूम) को दिशा हुन सक्ने बताइएको छ। वास्तुशास्त्रका जानकारहरूका अनुसार घरको कोठा कुन दिशामा अवस्थित छ भन्ने कुराले पारिवारिक सम्बन्धमा प्रत्यक्ष प्रभाव पार्न सक्छ।
वास्तु अनुसार दक्षिण–पूर्व (आग्नेय कोण) दिशामा रहेको शयनकक्ष दाम्पत्य जीवनका लागि उपयुक्त मानिँदैन। आग्नेय कोण अग्नि तत्वसँग सम्बन्धित हुने भएकाले यस दिशामा सुत्दा चिडचिडापन, क्रोध र असन्तुलन बढ्न सक्छ। यसको असर पति–पत्नीबीच अनावश्यक तकरार र तनावका रूपमा देखिन सक्ने बताइन्छ। त्यसको विपरीत, दक्षिण–पश्चिम दिशामा सुत्ने कोठा हुनु दाम्पत्य जीवनका लागि लाभदायक मानिन्छ। यस दिशाले सम्बन्धमा स्थिरता, विश्वास र आपसी समझदारी बढाउने विश्वास छ। साथै, ओछ्यानको टाउको दक्षिण वा पूर्वतर्फ राखेर सुत्नु राम्रो मानिन्छ।
घरको संरचना परिवर्तन गर्न नसकिने अवस्थामा पनि केही सामान्य उपाय अपनाउन सकिने सुझाव दिइएको छ। शान्त र आरामदायी महसुस गराउने रङ प्रयोग गर्नु, कोठालाई सफा र व्यवस्थित राख्ने, हावापानीको उचित व्यवस्था मिलाउने तथा अनावश्यक विद्युतीय सामग्री नराख्ने जस्ता उपाय प्रभावकारी हुन सक्ने जनाइएको छ। वास्तुका जानकारहरूका अनुसार साना सुधारले पनि सकारात्मक परिणाम दिन सक्छन्। दाम्पत्य जीवनमा निरन्तर तनाव देखिएमा सुत्ने कोठाको दिशा र सजावटतर्फ ध्यान दिनु उपयोगी हुन सक्ने बताइएको छ।
