काठमाडौँ । दिनमा पाँच कपसम्म क्याफिनयुक्त कफी पिउनु अधिकांश वयस्कका लागि सुरक्षित हुने र यसले मुटुको स्वास्थ्यमा समेत सकारात्मक प्रभाव पार्न सक्ने नयाँ अध्ययनले देखाएको छ।
अमेरिकन हार्ट एसोसिएसनले सार्वजनिक गरेको विस्तृत समीक्षा अध्ययनअनुसार दैनिक ४०० मिलिग्रामसम्म क्याफिन सेवन, अर्थात् करिब पाँच कप कफी पिउनु सामान्यतया सुरक्षित मानिएको छ। अनुसन्धानले यस्तो मात्रामा कफी सेवन गर्दा मुटुसम्बन्धी रोगको जोखिम नबढ्ने जनाएको छ। अध्ययनका सहलेखक तथा क्यालिफोर्निया विश्वविद्यालय, सान फ्रान्सिस्कोका चिकित्सा प्राध्यापक ग्रेगरी एम। मार्कसका अनुसार अतिरिक्त चिनी वा उच्च क्यालोरीयुक्त सामग्री नमिसाइएको क्याफिनयुक्त कफी दिनमा पाँच कपसम्म पिउँदा मुटुसम्बन्धी जोखिम बढेको प्रमाण फेला परेको छैन।
समीक्षाअनुसार नियमित रूपमा मध्यम मात्रामा कफी सेवन गर्ने व्यक्तिमा हृदयघात, हृदयसम्बन्धी रोग, स्ट्रोक, उच्च रक्तचाप तथा केही अवस्थामा टाइप–२ मधुमेहको जोखिम पनि कम देखिएको छ। अध्ययनले दिनमा दुईदेखि चार कप कफी सेवन गर्ने व्यक्तिमा मृत्युको जोखिम सबैभन्दा कम रहेको उल्लेख गरेको छ। विश्वभर अधिकांश वयस्कका लागि कफी नै क्याफिनको प्रमुख स्रोत भए पनि चिया, चकलेट, शीतल पेय पदार्थ तथा केही औषधिबाट पनि क्याफिन प्राप्त हुने अनुसन्धानकर्ताहरूले बताएका छन्। तर यी स्रोतबाट अत्यधिक मात्रामा क्याफिन सेवन गर्दा पर्ने प्रभावबारे पर्याप्त अध्ययन हुन बाँकी रहेको उनीहरूको भनाइ छ।
विशेषगरी ऊर्जा पेय एनर्जी ड्रिंक बाट उच्च मात्रामा क्याफिन सेवन गर्दा मुटुसम्बन्धी समस्या उत्पन्न हुन सक्ने भएकाले यस विषयमा थप अनुसन्धान आवश्यक रहेको अध्ययनमा उल्लेख गरिएको छ। अनुसन्धानका अनुसार कफीबाट प्राप्त क्याफिन कलेजोले प्रशोधन गर्ने गर्दछ र अधिकांश व्यक्तिमा सेवन गरेको करिब एक घण्टाभित्र यसको प्रभाव उच्च बिन्दुमा पुग्छ। तर क्याफिनको प्रभाव व्यक्तिको आनुवंशिक गुण, उमेर, शरीरको चयापचय प्रणाली तथा पहिलेदेखि क्याफिन सेवन गर्ने बानीका आधारमा फरक–फरक हुन सक्छ।
मार्कसले सबै व्यक्तिका लागि एउटै मात्रामा क्याफिन उपयुक्त नहुने भन्दै कसैलाई सुरक्षित मानिएको मात्रा अर्को व्यक्तिमा मुटुको धड्कन बढ्ने, चिन्ता बढ्ने वा निद्रामा समस्या हुने जस्ता असर देखिन सक्ने बताए। त्यसैले क्याफिन सेवन गर्दा आफ्नो शरीरको प्रतिक्रियालाई ध्यान दिनुपर्ने उनको सुझाव छ।अनुसन्धानकर्ताहरूले कफी सेवन गर्ने तरिका पनि स्वास्थ्यका लागि महत्त्वपूर्ण हुने उल्लेख गरेका छन्।
