काठमाडौँ। औषधि व्यवसायीहरूले औषधि व्यवस्था विभागअन्तर्गत रहेको औषधि ऐन, २०३५ को दफा ११ को उपदफा ५ खारेज गर्न माग गर्दै आज आइतबार बिहान विभाग कार्यालयमा धर्ना दिएका छन्। धर्नामा सहभागी व्यवसायीहरूले हातमा कालोपट्टी बाँधेर उपदफाको विरोध जनाएका छन्। नेपाल औषधि संघ, काठमाडौं शाखाका महासचिव शोभमान श्रेष्ठले सरकारको संशोधन प्रक्रिया व्यवसायीहरूलाई पलायन गर्न बाध्य बनाउने प्रयास भएको आरोप लगाए। उनले विवादास्पद उपदफा ५ तत्काल हटाइदिन माग गरे।
व्यवसायीहरूले मंसिर १७ गतेसम्म माग सुनुवाइ नभए कडा आन्दोलनमा जाने चेतावनी दिएका छन्। सेवाग्राहीको स्वास्थ्यलाई ध्यानमा राख्दै हालसम्म पसल सञ्चालन गरिरहेको उल्लेख गर्दै उनीहरूले आजबाट क्रमशः प्रत्येक दिन १.१ घण्टा थप्दै पसल बन्द गर्ने चेतावनी पनि दिए। हाल केही समययता औषधि व्यवसायीहरू आफ्ना मागका विषयमा निरन्तर आन्दोलनरत रहेका छन्।
