रोल्पा - थवाङ गाउँपालिका–२ जाजरकोट टोलमा ७१ वर्षीया सारू रोकाको हत्या भएको छ।
हत्या आरोपमा स्थानीय ३५ वर्षीय रामकुमार रोकालाई प्रहरीले नियन्त्रणमा लिएको छ। जिल्ला प्रहरी कार्यालय रोल्पाका अनुसार, रामकुमारले बन्दुकको कुन्दाले वृद्धाको टाउकोमा प्रहार गर्दा घटनास्थलमै मृत्यु भएको हो।
मदिरा सेवन गरेर सुतिरहेको अवस्थामा पक्राउ
राति करिब १२ बजे वृद्धाको हत्या भएको सूचना पाएपछि प्रहरी टोलीले घटनास्थलमा पुगेर रामकुमारलाई पक्राउ गरेको थियो। प्रहरीले रामकुमारलाई मदिराले मातेर घरमै सुतिरहेको अवस्थामा फेला पारेको हो।
हत्यामा प्रयोग भएको बन्दुक फेला
प्रहरीले हत्यामा प्रयोग भएको बन्दुक घटनास्थलदेखि करिब ७५ मिटर पर झाडीमा फेला पारेको छ। घटनाको थप अनुसन्धानका लागि इलाका प्रहरी कार्यालय घर्ती गाउँबाट प्रहरी निरीक्षक कृष्ण सोनीको नेतृत्वमा ५ जनाको टोली खटाइएको छ।
