काठमाडौँ । नेपाल प्रहरीले देशका विभिन्न स्थानमा चलाएको विशेष स्विप अपरेसन (निगरानी तथा खोजतलास) का क्रममा अवैध लागूऔषध ओसारपसार, बिक्री–वितरण र प्रयोगमा संलग्न रहेको अभियोगमा २४ जनालाई नियन्त्रणमा लिएको छ। सोमबार दिउँसोदेखि रातिसम्म गरिएका विभिन्न आकस्मिक चेकिङ तथा घर खानतलासीका क्रममा प्रहरीले संघीय राजधानी काठमाडौँसहित सुनसरी, सिन्धुली, रौतहट, झापा, मकवानपुर, कैलाली र कञ्चनपुर जिल्लाबाट ठुलो परिमाणमा गाँजा, नियन्त्रित फर्मास्युटिकल ड्रग्स, खैरो हेरोइन (ब्राउन सुगर) र नगद सहित उनीहरूलाई पक्राउ गरेको हो।
राजधानी काठमाडौँमा मात्रै प्रहरीले दुई महिलासहित ५ जनालाई पक्राउ गरेको छ। पशुपति क्षेत्र नजिकबाट ३५० ग्राम गाँजासहित सुर्खेतका खिमराज कठायत पक्राउ परेका छन् भने बुढानीलकण्ठ–४ मा ६० वर्षीया साइली तामाङको घरमा प्रहरी वृत्त महाराजगन्जले छापा मार्दा ३ केजी गाँजा बरामद भएको छ। यस्तै, बुढानीलकण्ठ–१२ स्थित कपन क्षेत्रबाट फर्मास्युटिकल लागूऔषध (डाइजेपाम, नोर्फिन र फेनारगन १५ एम्पुल) सहित विशाल आङ्देम्बे र नवराज नेपाली पक्राउ परेका छन्। उता पूर्वी नाका झापामा दमक, बिर्तामोड र मेचीनगर (काँकरभिट्टा) बाट फर्निचर र सिटी सफारी चेकजाँचका क्रममा खैरो हेरोइनसहित विमला दाहाल, हरसिंह राजवंशीसहित ४ जना र जीवन घिमिरे पक्राउ परेका छन् भने सुनसरीको धरान–८ बाट २–२ हजार ट्याब्लेट प्रतिबन्धित ट्रामाडोल र डिकोलिक जस्तो घातक औषधिसहित अञ्जक अन्सारीसहित २ जना समातिएका छन्।
यसै गरी, तराई र पश्चिम नेपालका नाकाहरूमा समेत लागूऔषध ब्युरो र स्थानीय प्रहरीले कडा एक्सन लिएको छ। सिन्धुलीको कमलामाई–९ भिमानमा जनकपुरबाट काठमाडौँ आउँदै गरेको हायस गाडीमा सवार कैलालीका अखिलजन विक्रम शाह र विकास साउदको झोलाबाट ६८ ग्रामभन्दा बढी खैरो हेरोइन बरामद भएको छ। रौतहटको चन्द्रपुरमा मोटरसाइकल चेकिङका क्रममा सन्देश कुश्वार र अरुण जङ्ग राई ६.३८ ग्राम ब्राउन सुगरसहित पक्राउ परेका छन् भने मकवानपुरको हेटौँडाबाट प्रतीक ठकुरीसहित २ जना समातिएका छन्। सुदूरपश्चिमको कैलाली र कञ्चनपुरमा मात्रै प्रहरीले ६ जनालाई नियन्त्रणमा लिएको छ। कञ्चनपुरको कृष्णपुरमा फुलचरण राना र हरिस रानाको घर खानतलासी गर्दा करिब साढे ९ ग्राम खैरो हेरोइन फेला परेको छ भने कैलालीको भजनी र धनगढी विमानस्थल मोडबाट शिव कामी, लक्ष्मण राना र दीपक दमाई ब्राउन सुगरसहित रङ्गेहात समातिएका छन्।
नेपाल प्रहरीका अनुसार पक्राउ परेका सबै अभियुक्तहरूलाई सम्बन्धित जिल्लाका प्रहरी हिरासतमा राखेर लागूऔषध नियन्त्रण ऐन, २०३३ बमोजिम म्याद थप गरी कानुनी कारबाही र अनुसन्धान अघि बढाइएको छ। यति ठुलो संजालमा एकै दिन यति धेरै व्यक्तिहरू पक्राउ पर्नुले सीमावर्ती क्षेत्र र मुख्य सहरहरूमा लागूऔषधको आन्तरिक ओसारपसार निकै भयानक रूपमा फैलिरहेको देखाउँछ।
