भारत उत्तर प्रदेशको मेरठ जिल्लामा १७ वर्षीया किशोरीको आफ्नै दाजुले हत्या गरेको घटना सार्वजनिक भएको छ।
घटना अगस्ट ७ बिहानको हो, जब भारी वर्षात भइरहेको थियो। प्रहरीका अनुसार हत्या प्रेम सम्बन्धको कारण भएको हो, जहाँ किशोरीले अर्को धर्मका व्यक्तिसँग प्रेम गरेको थिइन्।
हत्या भएको जानकारी पछि, शव २० मिनेटसम्म गाउँको मुख्य सडकको बीचमा नै रह्यो। तर, गाउँलेहरूले केही नगरेर चुपचाप हेरिरहे। केहीले घटना भिडियोमा कैद गरे पनि कोही पनि किशोरीलाई बचाउन अगाडि बढेनन्।
२८ वर्षीय आरोपी दाजुलाई गिरफ्तार गरी न्यायिक हिरासतमा पठाइएको छ। बिहान ९:३० बजे आसपासका मानिसहरूले दुईतले घरको भुइँतलामा दाजु-बहिनीबीच विवाद भइरहेको सुनेका थिए। एक छिमेकीले बनाएको भिडियोमा आरोपीले 'मैले पिताजीको सम्मान र गरिमा जोगाएको छु' भनेर भनिरहेको देखिन्छ।
इंडियन एक्सप्रेससँग कुराकानी गर्दा, एक छिमेकीले भने, "हामीले सोचेका थियौं कि दाजु आफ्नी पत्नीलाई पिटिरहेको छ, जुन यहाँ सामान्य घटना हो। केही मिनेटमै उसले घरबाट मात्र १०० मिटर टाढा आफ्नी बहिनीको हत्या गर्यो।"
स्टेशन हाउस अफिसर योगेन्द्र सिंहले घटना पुष्टि गरेका छन्। पीडित किशोरीको अर्को दाजुले भने कि उनकी बहिनीको उमेर चार महिनामा १८ वर्ष पुग्ने थियो र उनले आफूले प्रेम गरेको व्यक्तिसँग विवाह गर्ने योजना बनाएकी थिइन्।
किशोरीकी भाउजूले इंडियन एक्सप्रेसलाई भनेअनुसार, पीडित किशोरी आफ्नो स्कुलको टपर र कलाकार थिइन्। तर, आठौँ कक्षा पछि उनले विद्यालय जान छोडेकी थिइन्। किशोरी र प्रेमीबीचको भेट प्रेमीको बहिनीको विवाह पीडित किशोरीका परिवारका एक सदस्यसँग हुँदा भएको थियो।
