काठमाडौं । नेपाली कांग्रेसको महाधिवेशन नजिकिँदै जाँदा विभिन्न पदमा उम्मेदवारी घोषणा गर्ने क्रम बढेको छ।
यसै क्रममा लामो समयदेखि जापानस्थित नेपाली जनसम्पर्क समितिमार्फत कांग्रेसको राजनीतिमा सक्रिय चिरञ्जीवी थापाले खस–आर्यतर्फबाट केन्द्रीय सदस्य पदमा उम्मेदवारी घोषणा गरेका छन्। थापा नेपाली जनसम्पर्क समिति जापानमा पटक–पटक कार्यवाहक अध्यक्षको जिम्मेवारीमा समेत रहेका थिए। २०६२/६३ को जनआन्दोलनका क्रममा जापानस्थित नेपाली दूतावास घेराउ गर्ने क्रममा पक्राउ परेको विवरण पनि स्रोतमा उल्लेख छ। उनले २०४६ सालमा नेपाल विद्यार्थी संघको स्कुल इकाइबाट राजनीतिक यात्रा सुरु गरेका थिए।
अध्ययनका क्रममा जापान पुगेका थापा त्यहाँ रहेर कांग्रेसको संगठनात्मक गतिविधिमा सक्रिय भएका हुन्। उनले गैरआवासीय नेपाली संघ (एनआरएनए) जापानको कार्यवाहक अध्यक्षको जिम्मेवारीसमेत सम्हालिसकेको स्रोतमा उल्लेख छ। व्यवसायमा समेत संलग्न थापा बैंकिङ, होटल, ऊर्जा, सौर्य ऊर्जा तथा कृषि क्षेत्रमा आबद्ध रहेको बताइएको छ। उनले एमबीएसम्मको अध्ययन पूरा गरेका छन्। कांग्रेसको महाधिवेशनमा खस–आर्य समूहबाट केन्द्रीय सदस्य पदमा उम्मेदवारी घोषणा गर्दै थापाले आफ्नो राजनीतिक तथा संगठनात्मक अनुभवलाई पार्टीको केन्द्रीय भूमिकामा उपयोग गर्ने तयारी गरेका छन्।
