काठमाडौं । आज अर्थात् १२ अगस्ट २०२६ मा दुर्लभ खग्रास सूर्यग्रहण लाग्दैछ। यो ग्रहण ग्रिनल्यान्ड, आइसल्यान्ड, उत्तरी रुस, उत्तर आन्ध्र महासागर, स्पेन तथा पोर्चुगलका केही भूभागबाट देखिनेछ।
तर नेपालसहित दक्षिण एसिया र एसियाका अधिकांश भागबाट भने यो ग्रहण देखिने छैन। चन्द्रमाको पूर्ण छाया पृथ्वीको सीमित क्षेत्रमा मात्र पर्ने भएकाले नेपाल ग्रहणको मार्गमा नपरेको हो। नासाका अनुसार सन् १९९९ पछि मुख्य भूमि युरोपबाट देखिन लागेको यो पहिलो पूर्ण सूर्यग्रहण हो। स्पेनका लियोन, जारागोजा र भ्यालेन्सियालगायतका स्थानबाट पूर्ण ग्रहण देखिनेछ।
सूर्यग्रहणका क्रममा चन्द्रमा सूर्य र पृथ्वीको बीचमा आउँदा सूर्यको प्रकाश केही समयका लागि छेकिएर ग्रहण लाग्छ। यसपटक पूर्ण ग्रहणको अवधि अधिकांश स्थानमा दुई मिनेटभन्दा कम रहने बताइएको छ। ग्रहणको आंशिक चरणलाई नाङ्गो आँखाले हेर्न भने सुरक्षित हुँदैन। अवलोकन गर्दा प्रमाणित सौर्य चस्मा वा सुरक्षित सौर्य फिल्टर प्रयोग गर्नुपर्नेछ। नेपालबाट प्रत्यक्ष ग्रहण देखिने छैन। इच्छुकहरूले नासा तथा अन्य विश्वसनीय खगोलीय संस्थाका अनलाइन प्रत्यक्ष प्रसारणमार्फत ग्रहण हेर्न सक्नेछन्। आजको ग्रहणपछि अर्को महत्वपूर्ण पूर्ण सूर्यग्रहण २ अगस्ट २०२७ मा लाग्नेछ।
