रौतहट । रौतहटको सदरमुकाम गौरमा रगतले लतपतिएको अवस्थामा एउटा शंकास्पद बोरा फेला परेपछि स्थानीय बासिन्दा त्रसित बनेका छन्। गौरबाट पुरेनवातर्फ जाने सडकखण्डमा अवस्थित हनुमान मन्दिर नजिकै सोमबार दिउँसो उक्त शंकास्पद बोरा फेला परेको हो। सडकको किनारमा रगत लत्पतिएको अवस्थामा बोरा देखेपछि स्थानीयले तत्काल प्रहरीलाई खबर गरेका थिए।
घटनाबारे जानकारी प्राप्त हुनासाथ जिल्ला प्रहरी कार्यालय रौतहटबाट प्रहरीको विशेष टोली घटनास्थलमा पुगेको छ। प्रहरीले सम्भावित अपराध वा सुरक्षा जोखिमलाई ध्यानमा राख्दै घटनास्थललाई चारैतिरबाट सुरक्षा घेरा (सिल) हालेर नियन्त्रणमा लिएको छ र अनुसन्धान प्रक्रियालाई अगाडि बढाएको छ। उक्त शंकास्पद बोराभित्र के राखिएको छ भन्ने कुरा तत्कालै खुल्न नसकेको जिल्ला प्रहरी कार्यालय रौतहटले जनाएको छ।
प्रहरी स्रोतका अनुसारः “घटनास्थलमा आवश्यक कानुनी एवं प्राविधिक प्रक्रिया (मुचुल्का तयार पार्ने कार्य) पूरा गरेर मात्रै बोरा खोल्ने तयारी भइरहेको छ। जनमानसमा विभिन्न शङ्का–उपशङ्का उब्जिएकाले प्रहरीले गम्भीरताका साथ प्रमाणहरू सङ्कलन गरिरहेको छ।”
