काठमाडौं। स्पेनले अर्जेन्टिनालाई १–० ले पराजित गर्दै फिफा विश्वकप २०२६ को उपाधि आफ्नो नाममा गरेको छ। अमेरिकाको न्यु जर्सी स्टेडियममा सम्पन्न रोमाञ्चक फाइनलमा अतिरिक्त समयमा गरेको एकमात्र गोल स्पेनलाई विश्वविजेता बनाउन पर्याप्त बन्यो।
निर्धारित ९० मिनेटसम्म दुवै टोलीले गोल गर्न नसकेपछि खेल अतिरिक्त समयमा पुगेको थियो। त्यसपछि १०६औँ मिनेटमा फेरान टोरेसले गरेको उत्कृष्ट गोलले स्पेनलाई निर्णायक अग्रता दिलाए। उनले पेनाल्टी क्षेत्रभित्र बाउन्स भएको बललाई देब्रे खुट्टाले प्रहार गर्दै क्रसबारमुनिबाट जाली चुमाएका थिए। निर्धारित समयको अन्त्यतिर अर्जेन्टिनाका एन्जो फर्नान्डेजले दोस्रो पहेँलो कार्ड पाएपछि मैदान छाड्नुपरेको थियो। त्यससँगै १० खेलाडीमा सीमित बनेको अर्जेन्टिनामाथि स्पेनले थप दबाब सिर्जना गर्दै अतिरिक्त समयको दोस्रो हाफको सुरुवातमै गोल गर्दै उपाधि सुनिश्चित गर्यो।
खेलभरि बल नियन्त्रण र आक्रमणमा स्पेन प्रभावशाली देखियो। सन् २०१० पछि पहिलो पटक विश्वकप जित्दै स्पेनले १६ वर्ष लामो उपाधि खडेरी अन्त्य गरेको हो। स्पेनले प्रतियोगिताभर खेलेका आठ खेलमा केवल एक गोल मात्र व्यहोर्दै नयाँ कीर्तिमानसमेत बनाएको छ। विश्वकप इतिहासमा कुनै पनि च्याम्पियन टोलीले सबैभन्दा कम गोल खाएको यो नयाँ रेकर्ड हो। यससँगै स्पेनको अपराजित यात्राले पनि नयाँ उचाइ छोएको छ। टोली पछिल्ला ३८ अन्तर्राष्ट्रिय खेलमा अपराजित रहँदै २९ जित र ९ बराबरीको नतिजा निकाल्न सफल भएको छ। यो कुनै पनि युरोपेली राष्ट्रले बनाएको सबैभन्दा लामो अपराजित शृङ्खला हो।
यसअघि इटालीले अक्टोबर २०१८ देखि सेप्टेम्बर २०२१ सम्म ३७ खेलसम्म अपराजित रहने कीर्तिमान बनाएको थियो। स्पेनले त्यस रेकर्डलाई उछिन्दै नयाँ इतिहास रचेको हो। उता, सन् २०२२ को विश्वकप विजेता अर्जेन्टिना भने लगातार दोस्रो पटक विश्व च्याम्पियन बन्ने लक्ष्य पूरा गर्न असफल रह्यो। फाइनलमा पराजित भएसँगै अर्जेन्टिनाको उपाधि रक्षा गर्ने सपना पनि अधुरै रह्यो।
