भारत । ओडिशाको कटक जिल्लामा एक युवकले आत्मरक्षाका क्रममा चितुवाको आक्रमणबाट ज्यान जोगाएका छन्। उक्त संघर्षमा चितुवाको मृत्यु भएको छ भने युवक गम्भीर घाइते भएका छन्।
घटना शुक्रबार राति कटक जिल्लाको अनन्तप्रसाद गाउँमा भएको हो, जुन नरसिंहपुर वेस्ट फरेस्ट रेञ्ज अन्तर्गत पर्छ। मिडिया रिपोर्टअनुसार घाइते युवकको पहिचान सुभ्रांशु भोलका रूपमा भएको छ।
उनका बुवा सुधर्शन भोलका अनुसार सुभ्रांशु राति फार्महाउसमा एक्लै थिए। सोही क्रममा बाहिर कुकुरहरूको भुकाइ सुनिएपछि उनले ढोका खोलेर हेर्दा एक चितुवा घरभित्र पसेर आक्रमण गरेको थियो। चितुवाको आक्रमणबाट सुभ्रांशु गम्भीर घाइते भएका थिए।
प्रारम्भिक जानकारीअनुसार उनले चितुवालाई भगाउने प्रयास गरे पनि सफल नभएपछि भान्सामा रहेको चक्कु प्रयोग गरी आत्मरक्षा गरेका थिए। चक्कुको चोटका कारण चितुवा केही समयमै ढलेर मरेको जनाइएको छ। त्यसपछि सुभ्रांशुले आफूलाई कोठाभित्र थुनेर फोनमार्फत परिवारलाई जानकारी गराएका थिए।
घटनापछि एम्बुलेन्समार्फत उनलाई नजिकको अस्पताल लगिएको थियो। अवस्था गम्भीर भएपछि कटकस्थित एससीबी मेडिकल कलेज तथा अस्पतालमा भर्ना गरिएको छ। चिकित्सकका अनुसार उनको शरीरमा धेरै गहिरा चोटहरू छन् र उपचार जारी छ। हाल उनको अवस्था स्थिर रहेको बताइएको छ।
घटनाको जानकारी पाएलगत्तै वन विभागको टोली घटनास्थलमा पुगेको थियो। चितुवाको शव नियन्त्रणमा लिइएको छ।
