काठमाडौँ । बंगलादेशकी पूर्वप्रधानमन्त्री शेख हसिनाको अवामी लिग पार्टीले नोभेम्बर ३० सम्म देशव्यापी विरोध प्रदर्शनको आह्वान गरेको छ । नोभेम्बर १७ मा, अन्तर्राष्ट्रिय अपराध न्यायाधिकरणले ७८ वर्षीया हसिना र तत्कालीन गृहमन्त्री असदुज्जमान खान कमललाई मृत्युदण्डको सजाय सुनाएको थियो ।
अवामी लिगले न्यायाधिकरणको निर्णय मोहम्मद युनुसको अन्तरिम सरकारले हसिना र उनको पार्टीलाई अर्को वर्ष फेब्रुअरीमा हुने आम चुनावबाट बाहिर राख्ने राजनीतिक षड्यन्त्रको हिस्सा भएको आरोप लगाएको छ । पार्टीले न्यायाधिकरणको निर्णयलाई अस्वीकार गरेको र यसलाई अवैध भनेको आफ्नो आधिकारिक एक्स ह्यान्डलमा लेखेको छ । लिगले युनुसको राजीनामा समेत माग गरेको छ।
