काठमाडौं । विद्यालयमा शिक्षकको अभाव, कक्षाकोठामा अत्यधिक विद्यार्थी तथा जीर्ण भौतिक संरचनाको विरोधमा फ्रान्सका विद्यार्थीहरूले थालेको प्रदर्शन चर्किँदै गएको छ।
पेरिसबाट सुरु भएको विद्यार्थी आन्दोलन देशका विभिन्न क्षेत्रमा फैलिएको छ। प्रदर्शनका क्रममा केही स्थानमा सडकमा अवरोध खडा गर्नुका साथै आगजनीका घटना भएका छन् भने प्रहरी र प्रदर्शनकारीबीच झडपसमेत भएको छ। फ्रान्सको शिक्षा मन्त्रालयका अनुसार आन्दोलनका कारण ५०० भन्दा बढी विद्यालयको पठनपाठन प्रभावित भएको छ। प्रदर्शनका क्रममा कम्तीमा ६५ जना शैक्षिक कर्मचारी घाइते भएको बीबीसीले जनाएको छ।
विद्यार्थीहरूले विद्यालयमा पर्याप्त शिक्षकको व्यवस्था गर्नुपर्ने, कक्षाकोठामा हुने अत्यधिक भीड कम गर्नुपर्ने तथा जीर्ण विद्यालय भवनको सुधार गर्नुपर्ने माग राखेका छन्। उनीहरूले विद्यालयको वर्तमान अवस्थाले अध्ययनमा प्रत्यक्ष असर परेको बताएका छन्। प्रदर्शनका क्रममा प्रहरीतर्फबाट अश्रुग्यास प्रयोग गरिएको तथा केही स्थानमा प्रदर्शनकारीले प्रहरीसँग झडप गरेका विवरण सार्वजनिक भएका छन्। पेरिससहित विभिन्न सहरमा सडकमा अवरोध तथा आगजनीका घटना पनि देखिएका छन्।
फ्रान्सका न्यायमन्त्री जेराल्ड डार्मानिनले विद्यार्थीको प्रदर्शन पछिल्लो समय सार्वजनिक व्यवस्था प्रभावित हुने स्तरमा पुगेको बताएका छन्। सरकारका तर्फबाट विद्यार्थीका केही मागलाई सम्बोधन गर्नुपर्ने आवश्यकता स्वीकार गरिए पनि हिंसात्मक गतिविधिलाई स्वीकार गर्न नसकिने बताइएको छ। यसैबीच फ्रान्सको दोस्रो ठूलो श्रमिक संगठन सीजीटीले पनि विद्यार्थीहरूको आन्दोलनमा समर्थन जनाउँदै आगामी ६ अक्टोबरमा हुने प्रदर्शनमा सहभागी हुने घोषणा गरेको छ।
सरकारका केही प्रतिनिधिले विद्यार्थी आन्दोलनमा वामपन्थी राजनीतिक समूहहरूको प्रभाव रहेको आरोप लगाएका छन्। तर सम्बन्धित समूहले उक्त आरोप अस्वीकार गर्दै आन्दोलन विद्यार्थीहरूले आफ्नै रूपमा सञ्चालन गरिरहेको दाबी गरेका छन्। विद्यालयको अवस्था सुधार, शिक्षक अभाव र शिक्षा क्षेत्रमा पर्याप्त स्रोत उपलब्ध गराउने विषयलाई लिएर सुरु भएको आन्दोलन पछिल्लो समय फ्रान्सको सार्वजनिक बहसको प्रमुख विषय बनेको छ।
