काठमाडौं ।फ्लाई दुबईको विमानमा ककपिटभित्रै सह–पाइलटबाट भएको आक्रमणपछि सम्भावित ठूलो दुर्घटना रोक्न भूमिका खेलेका भारतीय क्याप्टेन स्मित मच्छरको अमेरिकी राष्ट्रपति डोनाल्ड ट्रम्पले प्रशंसा गरेका छन्।
फ्लाई दुबईको एफजेड–१०७३ उडानका क्रममा सह–पाइलटले क्याप्टेन मच्छरमाथि चक्कु प्रहार गरेपछि विमानको उडानमा समस्या उत्पन्न भएको थियो। आक्रमणपछि विमान केही हजार फिट तल झरेको विवरण सार्वजनिक भएको छ।अचानक उत्पन्न भएको परिस्थितिमा चालक दलका सदस्य र यात्रुहरूले आक्रमणकारीलाई नियन्त्रणमा लिन सहयोग गरेका थिए। त्यसपछि क्याप्टेनले विमानलाई नियन्त्रणमा लिएर साउदी अरेबियामा सुरक्षित अवतरण गराएको बताइएको छ।
ट्रम्पले घटनाका विषयमा इजरायली प्रधानमन्त्री बेन्जामिन नेतान्याहुसँग कुराकानी गरेको जानकारी दिएका छन्। उनले आक्रमणमा संलग्न व्यक्तिको उद्देश्यबारे प्रश्न उठाउँदै ती व्यक्ति सम्भावित रूपमा आतङ्कवादी वा मानसिक रूपमा असामान्य हुन सक्ने टिप्पणी गरेका छन्। यद्यपि घटनाको वास्तविक कारणबारे सम्बन्धित निकायले अनुसन्धान गरिरहेको छ।घटनाका बेला विमानमा रहेका एक इजरायली यात्रुले पनि ककपिटमा पुगेर आक्रमणकारीलाई नियन्त्रणमा लिन सहयोग गरेका थिए। उड्डयन क्षेत्रमा अनुभव नभए पनि उनले पाइलटको सिटबाट आक्रमणकारीलाई हटाउन सहयोग गरेको बताइएको छ। इजरायली प्रधानमन्त्री नेतान्याहुले ती यात्रुको भूमिकालाई प्रशंसा गरेका छन्।
विमानमा रहेका १७४ जनाको सुरक्षा सुनिश्चित गर्न क्याप्टेन, चालक दल र यात्रुहरूले तत्काल गरेको प्रयास महत्वपूर्ण रहेको इजरायलको विदेश मन्त्रालयले जनाएको छ।भारतीय तथा इजरायली कूटनीतिक अधिकारीहरूले क्याप्टेन मच्छरको संयम र साहसको प्रशंसा गरेका छन्। भारतका लागि इजरायली राजदूत रुभेन अजार तथा इजरायलस्थित भारतीय दूतावासले उनको शीघ्र स्वास्थ्यलाभको कामना गरेका छन्।
क्याप्टेन मच्छरसँग व्यावसायिक विमान उडानको १३ वर्षभन्दा बढी अनुभव रहेको बताइएको छ। उनले बोइङ–७३७ विमानमा करिब नौ हजार ७५० घण्टा उडान गरिसकेको विवरण छ। फ्लाई दुबईमा आबद्ध हुनुअघि उनले भारतीय एयरलाइन्समा करिब ११ वर्ष काम गरेका थिए।घटनापछि फ्लाई दुबईले इजरायल जाने तथा इजरायलबाट आउने उडानहरू केही समयका लागि स्थगित गर्ने जनाएको छ। विमानभित्र आक्रमण कसरी भयो र त्यसको कारण के थियो भन्नेबारे अनुसन्धान जारी रहेको छ।
