काठमाडौं ।क्रिस्टियानो रोनाल्डोले पोर्चुगलको राष्ट्रिय फुटबल टोलीको प्रशिक्षण शिविर अचानक छाडेका छन्।
उनले क्याम्पबाट बाहिरिनुको वास्तविक कारण भने अहिले सार्वजनिक गरेका छैनन्। उचित समयमा यसबारे विस्तृत जानकारी दिने रोनाल्डोले बताएका छन्।सामाजिक सञ्जालमा प्रतिक्रिया दिँदै रोनाल्डोले पोर्चुगल फुटबल महासंघका अध्यक्षसँग छलफल गरेपछि टोलीको क्याम्प छाड्ने निर्णय गरेको जानकारी दिएका हुन्। उनले आगामी खेलका लागि राष्ट्रिय टोलीका आफ्ना सहकर्मीलाई शुभकामनासमेत दिएका छन्।रोनाल्डोको यो निर्णय प्रशिक्षक जोर्जे जेसुससँग उनको सम्बन्धलाई लिएर विभिन्न चर्चा भइरहेका बेला आएको हो। नर्वेविरुद्धको खेलमा रोनाल्डो बेन्चमै सीमित भएपछि उनी र प्रशिक्षकबीच असमझदारी रहेको अड्कलबाजी सुरु भएको थियो।
ओस्लोमा भएको उक्त खेल पोर्चुगलले २–१ ले जिते पनि रोनाल्डो मैदानमा प्रवेश गरेनन्। खेलपछि उनी अन्य खेलाडीहरूसँग समर्थकलाई अभिवादन गर्न नगई सिधै ड्रेसिङ रुमतर्फ गएको दृश्यले समेत चर्चा पाएको थियो।तर प्रशिक्षक जेसुसले रोनाल्डोसँग कुनै विवाद नभएको बताएका थिए। उनका अनुसार नर्वेविरुद्धको खेलमा रोनाल्डोलाई सुरुआती ११ मा नराख्ने जानकारी पहिल्यै दिइएको थियो। खेलको परिस्थितिअनुसार उनलाई पछि मैदानमा पठाउने योजना भए पनि अन्ततः प्रशिक्षकले उनलाई खेलाउन आवश्यक नदेखेका थिए।
रोनाल्डोले प्रशिक्षणमा सहभागी हुन अस्वीकार गरेको भन्ने चर्चालाई पनि जेसुसले खण्डन गरेका थिए। उनका अनुसार रोनाल्डोले टोलीको सामूहिक अभ्यासको सट्टा व्यक्तिगत ‘मोबिलिटी’ र ‘स्ट्रेन्थेनिङ’ अभ्यास गरेका थिए।यद्यपि डेनमार्कमा टोलीले प्रशिक्षण गरिरहँदा रोनाल्डो अन्य खेलाडीसँग मैदानमा देखिएनन्। त्यहाँका सञ्चारमाध्यमले उनलाई पार्केन रंगशालाबाट टोलीका स्टाफसँग बाहिरिँदै गरेको दृश्य सार्वजनिक गरेका थिए।
यसअघि रोनाल्डोले आगामी विश्वकपपछि अन्तर्राष्ट्रिय फुटबलबाट टाढिने विषयमा सोचिरहेको बताएका थिए। तर आफ्नो करिअरमा १ हजार गोल पूरा गर्ने लक्ष्यलाई ध्यानमा राख्दै राष्ट्रिय टोलीमा निरन्तर रहने निर्णय गरेका थिए।हालको अन्तर्राष्ट्रिय विश्रामका लागि पोर्चुगलले घोषणा गरेको २५ सदस्यीय टोलीमा रोनाल्डो पनि थिए। उनले वेल्सविरुद्धको नेसन्स लिग खेलमा सुरुआत गरेका थिए।नर्वेविरुद्ध निर्णायक गोल गरेका गोन्कालो रामोसलाई प्रशिक्षक जेसुसले आगामी खेलमा पनि प्राथमिकता दिन सक्ने संकेत गरेका थिए। जेसुसले टोलीलाई रोनाल्डोको आवश्यकता परेको अवस्थामा मात्र उनलाई मैदानमा उतार्ने बताएका थिए।पोर्चुगल फुटबल महासंघले रोनाल्डोले प्रशिक्षण क्याम्प छाडेको पुष्टि गरेको छ। महासंघका अनुसार बाँकी खेलाडीले पूर्वनिर्धारित कार्यक्रमअनुसार आगामी खेलको तयारी जारी राख्नेछन्।
