काठमाडौं ।नेपाली कांग्रेसका युवा नेता निरंजन कुमार साहले आगामी प्रतिनिधिसभा निर्वाचनमा पर्सा निर्वाचन क्षेत्र नम्बर २ बाट उम्मेदवार बन्ने घोषणा गरेका छन्।
पर्सागढी नगरपालिका–४, सबैयाका स्थानीय साहले असोज १३ गते उम्मेदवारी घोषणा गर्दै पर्सा–२ मा नयाँ नेतृत्वको आवश्यकता रहेको बताएका छन्।युवा पुस्ताबीच सक्रिय रहेका साहले निर्वाचनमा जनताका आधारभूत समस्या र क्षेत्रको विकासलाई मुख्य एजेन्डा बनाउने बताएका छन्। रोजगारी सिर्जना, शिक्षा, स्वास्थ्य तथा सुशासनलाई प्राथमिकतामा राखेर काम गर्ने उनको भनाइ छ।
उम्मेदवारी घोषणासँगै पर्सा–२ को आगामी निर्वाचनलाई लिएर स्थानीय राजनीतिक वृत्तमा चर्चा सुरु भएको छ। कांग्रेसभित्र पनि युवा नेतृत्व र नयाँ पुस्ताको प्रतिनिधित्वबारे चासो बढेको देखिएको छ।साहले जनताको विश्वासलाई आधार बनाएर क्षेत्रको विकास तथा नागरिकका अधिकारका विषय संसद्मा प्रभावकारी रूपमा उठाउने उद्देश्यले चुनावी मैदानमा आउन लागेको बताएका छन्।
पर्सा–२ मा विगतका निर्वाचनमा पनि विभिन्न राजनीतिक दलका उम्मेदवारबीच प्रतिस्पर्धा हुँदै आएको छ। २०७९ सालको प्रतिनिधिसभा निर्वाचनमा यस क्षेत्रबाट नेपाली कांग्रेसका अजयकुमार चौरसिया उम्मेदवार बनेका थिए।साहको उम्मेदवारी घोषणापछि आगामी निर्वाचनमा पर्सा–२ को राजनीतिक प्रतिस्पर्धा र समीकरण कसरी अघि बढ्छ भन्ने विषयमा चासो बढेको छ।
