काठमाडौं । विद्यार्थी राजनीतिबाट आफ्नो राजनीतिक यात्रा सुरु गरेका युवा नेता सरोज केसी अहिले नेपाली कांग्रेसको संगठनमा सक्रिय युवा नेताका रूपमा अघि आएका छन्।
नेपाल विद्यार्थी संघ (नेविसंघ) को केन्द्रीय सदस्य हुँदै पार्टीको क्षेत्रीय सचिवसम्मको जिम्मेवारी सम्हालेका केसी युवापुस्तामाझ परिचित छन्। वि.सं. २०४२ साल जेठ ४ गते जन्मिएका केसीले १५ वर्षकै उमेरमा नेविसंघमार्फत राजनीतिक यात्रा सुरु गरेका थिए। विद्यार्थी राजनीतिमा सक्रिय रहँदा उनले कलेज एकाइ सभापति, क्षेत्रीय सभापति, जिल्ला सदस्य र जिल्ला सचिवको जिम्मेवारी सम्हाले। २०६२/६३ को जनआन्दोलनका क्रममा नेविसंघका तर्फबाट सक्रिय भूमिका निर्वाह गरेका केसी त्यसपछि नेविसंघको केन्द्रीय सदस्य बने। विद्यार्थी संगठनमा हासिल गरेको अनुभवलाई पार्टीको मूल राजनीतिमा निरन्तरता दिँदै उनले नेपाली कांग्रेसमा समेत विभिन्न जिम्मेवारी सम्हालेका छन्।
केसीले प्रदेश सभा सचिव र प्रतिनिधिसभा क्षेत्रीय सचिवको जिम्मेवारीसमेत सम्हालिसकेका छन्। संगठनका विभिन्न तहमा काम गरेको अनुभवका कारण उनी पार्टीभित्र युवा पुस्ताको प्रतिनिधिका रूपमा समेत चिनिँदै आएका छन्। राजनीतिसँगै केसी व्यवसायमा पनि सक्रिय छन्। राजनीति शास्त्र तथा बिजनेस अध्ययनका लागि नेदरल्यान्ड्स पुगेका उनले अध्ययनपछि नेपाल फर्किएर व्यवसायलाई समेत अघि बढाएका हुन्। राजनीति र व्यवसाय दुवै क्षेत्रमा सक्रिय रहेका केसी युवामाझ परिचित युवा नेता तथा व्यवसायीका रूपमा रहेका छन्।
विद्यार्थी संगठनबाट सुरु भएको उनको राजनीतिक यात्रा अहिले पार्टीको क्षेत्रीय तहसम्म पुगेको छ। लामो समय संगठनमा सक्रिय रहेका केसीले युवाको सहभागिता र नेतृत्वलाई पार्टीको संगठन निर्माणसँग जोडेर अघि बढ्नुपर्ने धारणा राख्दै आएका छन्। कांग्रेसभित्र पुस्तान्तरण र युवाको नेतृत्वबारे बहस चलिरहेका बेला नेविसंघको केन्द्रीय सदस्यदेखि क्षेत्रीय सचिवसम्मको जिम्मेवारी सम्हालेका केसीको राजनीतिक यात्रा पनि युवा पुस्ताको संगठनात्मक सक्रियताको एउटा उदाहरणका रूपमा अघि आएको छ।
