काठमाडौं । कोलम्बियामा गएको शक्तिशाली ७.४ म्याग्निच्युडको भूकम्पमा परी कम्तीमा १३२ जनाको मृत्यु भएको छ। सयौं मानिस अझै सम्पर्कविहीन रहेको र खोजी तथा उद्धार कार्य जारी रहेको स्थानीय अधिकारीहरूले बताएका छन्।
प्रारम्भिक विवरणमा १११ जनाको मृत्यु र ८७ जना घाइते भएको बताइएको थियो। पछिल्लो विवरणअनुसार मृतकको संख्या बढेर १३२ पुगेको छ भने करिब ५७० जना घाइते भएका छन्।
कोलम्बियन जियोलोजिकल सर्भिसका अनुसार यो भूकम्प २१औँ शताब्दीमा कोलम्बियामा रेकर्ड भएको सबैभन्दा शक्तिशाली भूकम्प हो। यसको केन्द्रबिन्दु राजधानी बोगोटाबाट करिब ४०० किलोमिटर पश्चिममा रहेको चोको क्षेत्रको सान होसे डेल पालमार आसपास रहेको अमेरिकी भूगर्भ सर्वेक्षण (USGS)ले जनाएको छ। भूकम्प करिब १०७ किलोमिटर गहिराइमा गएको थियो।
भूकम्पको प्रभाव पश्चिमी कोलम्बियाका काली, पेरेइरा, क्विब्दो र मानिजालेससहितका शहरमा परेको छ। छिमेकी इक्वेडर र पानामासम्म समेत धक्का महसुस गरिएको थियो। मुख्य भूकम्पपछि दर्जनौं परकम्प गएको अधिकारीहरूले बताएका छन्।
संकटकाल घोषणा, भग्नावशेषमा खोजी
भूकम्पबाट ठूलो क्षति भएपछि कोलम्बिया सरकारले राष्ट्रिय संकटकाल घोषणा गरेको छ। राष्ट्रपति अबेलार्दो दे ला एस्प्रिएल्लाले प्रभावित क्षेत्रमा उद्धार, राहत र मानवीय सहायता तीव्र पारिएको बताएका छन्।
कालीमा दर्जनौं भवन पूर्ण रूपमा भत्किएका छन् भने सयौं संरचनामा क्षति पुगेको विवरण आएको छ। भग्नावशेषमा मानिस फसेको आशंकामा उद्धार टोलीले खोजी गरिरहेको छ।
रिसाराल्दा क्षेत्रमा मात्रै कम्तीमा ४० जनाको मृत्यु भएको स्थानीय अधिकारीहरूले बताएका छन्। भाये डेल काउकामा २७ जनाको मृत्यु भएको र मृतकमध्ये बालबालिका पनि रहेको जनाइएको छ। केन्द्रबिन्दु नजिकको चोको क्षेत्रमा सञ्चार सेवा प्रभावित भएकाले त्यहाँको क्षतिको पूर्ण विवरण आउन अझै बाँकी छ।
हजारौं आफन्त सम्पर्कविहीन भएको विवरण
भूकम्पपछि मानिसहरूले बेपत्ता आफन्तबारे अनलाइनमार्फत विवरण राख्न थालेका छन्। एउटा डिजिटल डेटाबेसमा मात्रै १ हजार ४०० भन्दा बढी मानिस सम्पर्कविहीन भएको विवरण संकलन भएको जनाइएको छ।
पेरेइरामा विमानस्थलको संरचनामा समेत क्षति पुगेको छ। केही भवन भत्किएका छन् भने मानिजालेसमा ऐतिहासिक क्याथेड्रलको टावरको एक भाग खसेको बताइएको छ।
भूकम्पपछि पश्चिमी क्षेत्रका केही विमानस्थलमा उडान सेवा अस्थायी रूपमा रोक्दै संरचनाको प्राविधिक परीक्षण भइरहेको छ।
अमेरिकासहित विभिन्न देशबाट सहयोगको घोषणा
विनाशकारी भूकम्पपछि अमेरिकाले कोलम्बियालाई आपत्कालीन राहत तथा उद्धारका लागि १ करोड ५५ लाख अमेरिकी डलर सहयोग गर्ने घोषणा गरेको छ।
त्यस्तै मेक्सिको, एल साल्भाडोर, चिली, इजरायल, इक्वेडर र फ्रान्सलगायतका देशले पनि उद्धार तथा राहत कार्यमा सहयोग गर्ने प्रतिबद्धता जनाएका छन्।
भूकम्पको ठूलो परिमाण र पश्चिमी क्षेत्रका धेरै संरचनामा भएको क्षतिका कारण मृतक तथा बेपत्ताको संख्या अझ बढ्न सक्ने अधिकारीहरूले बताएका छन्। उद्धार टोलीले भग्नावशेषमा खोजी जारी राखेकाले क्षतिको पूर्ण विवरण आउन केही समय लाग्ने जनाइएको छ।
