काठमाडौँ। अमेरिका र इरानबीच युद्ध अन्त्य गर्ने सहमति भएको घोषणा सार्वजनिक भएपछि अन्तर्राष्ट्रिय बजारमा कच्चा तेलको मूल्यमा उल्लेखनीय गिरावट आएको छ।
अमेरिकी राष्ट्रपति डोनाल्ड ट्रम्पले इरानसँगको द्वन्द्व अन्त्यका लागि ऐतिहासिक समझदारी भएको र इरानमाथिको नौसैनिक नाकाबन्दी हटाइने बताएका छन्। उक्त घोषणापछि विश्व ऊर्जा बजारमा सकारात्मक प्रभाव देखिएको हो। बजार तथ्यांकअनुसार ब्रेन्ट क्रुडको मूल्य करिब ३.९ प्रतिशतले घटेर प्रतिब्यारेल ८४ डलर आसपास पुगेको छ भने अमेरिकी क्रुडको मूल्य ४.८ प्रतिशतले घट्दै प्रतिब्यारेल ८१ डलर नजिक झरेको छ। यसलाई पछिल्ला केही महिनायता तेल बजारमा देखिएको सबैभन्दा ठूलो गिरावटमध्ये एक मानिएको छ। विश्लेषकहरूका अनुसार युद्धको जोखिम कम भएसँगै तेल आपूर्तिमा रहेको अनिश्चितता घटेको छ, जसले मूल्यमा दबाब सिर्जना गरेको हो। यसअघि सम्भावित सम्झौताको संकेतपछि नै तेलको मूल्य क्रमशः घट्न थालेको थियो। युद्धविरामसँगै विश्वकै महत्वपूर्ण तेल ढुवानी मार्ग हर्मुज जलडमरूमध्य पुनः सहज रूपमा सञ्चालन हुने अपेक्षा गरिएको छ।
यद्यपि, जलमार्गमा बिछ्याइएका माइन हटाउने, बन्द रहेका तेलकुवा पुनः सञ्चालनमा ल्याउने तथा क्षतिग्रस्त ऊर्जा पूर्वाधार मर्मत गर्ने काम अझै बाँकी रहेकाले आपूर्ति पूर्ण रूपमा सामान्य हुन केही समय लाग्ने विज्ञहरूको भनाइ छ। ऊर्जा क्षेत्रका जानकारहरूका अनुसार तत्कालका लागि मूल्य घटे पनि दीर्घकालीन रूपमा तेल सस्तो रहने सम्भावना कम छ। विश्वभरका देशहरूले आफ्नो रणनीतिक इन्धन भण्डारण पुनः भर्न थालेपछि तथा माग बढ्न थालेपछि मूल्यमा पुनः वृद्धि हुन सक्ने अनुमान गरिएको छ। युद्ध अन्त्यको खबरले तेल बजारसँगै अमेरिकी सेयर बजारमा पनि सकारात्मक प्रभाव पारेको छ। डाउ फ्युचर्स, एस एन्ड पी ५०० र नास्डाक फ्युचर्समा समेत वृद्धि देखिएको अन्तर्राष्ट्रिय सञ्चारमाध्यमहरूले जनाएका छन्।
