-
उज्यालोलाई
चिठीजस्तै खाममा सिलबन्दी गरेर
हरेक बिहान–हुलाकीझैँ
उड्दै–उड्दै यी चराका बथानहरू
कहाँ पुग्छन् ?
र, घर फर्कँदा
के बोकेर फर्कन्छन्
चारो कि स्वतन्त्रता ?
चराहरू झगडा गरेको देख्दिनँ
किन बा,
बन्दुकसँग डराउँछन् यी चराहरू ?
किन बा,
चराहरूलाई आतंक मन पर्दैन ?
किन बा,
मान्छेजस्ता छैनन् यी चराहरू ?
आगो आफैं लाग्दैन
– लगाइन्छ
हो त्यत्तिबेला
चराहरू रून्छन् कि रूदैनन् ?
चराहरूको आँखामा आँसु हुन्छ कि हुँदैन ?
प्रत्येक मान्छेको भागमा परेझैं
चराहरूको भागमा
छ कि छैन–
घाम र पानी ?
धर्ती र आकाश ?
चराहरू कुन धर्म मान्छन् ?
चराहरूको जात कुन हुन्छ ?
चराहरूको रगतको रङ कस्तो हुन्छ ?
किन बा,
मान्छेजस्तै विभाजित छैनन् यी चराहरू ?
मेरो देशमा
अञ्चल र जिल्लाहरू भएझैं
चराहरूको पनि
अञ्चल र जिल्लाहरू होलान् ?
साँच्चै बा,
चराहरूको देश हुन्छ कि हुँदैन ?
