काठमाडौँ । अमेरिकी राष्ट्रपति डोनाल्ड ट्रम्पको पहलपछि अमेरिकी राष्ट्रिय टोलीका स्ट्राइकर फोलारिन बालोगुनमाथि लागेको एक खेलको स्वतः प्रतिबन्ध फिफाले अस्थायी रूपमा स्थगित गरेको छ। यससँगै उनी बेल्जियमविरुद्ध हुने विश्वकपको अन्तिम १६ को खेलमा मैदान उत्रन पाउने भएका छन्।
अमेरिकी सञ्चारमाध्यम (फक्स न्युज)का अनुसार ट्रम्पले फिफा अध्यक्ष जियानी इन्फान्टिनोलाई टेलिफोन गर्दै बालोगुनमाथिको प्रतिबन्ध पुनरावलोकन गर्न आग्रह गरेका थिए। बालोगुन बोस्निया एन्ड हर्जगोभिनाविरुद्धको प्रि–क्वार्टरफाइनल खेलमा रातो कार्ड पाएपछि स्वतः एक खेलका लागि निलम्बित भएका थिए। फिफाको अनुशासन समितिले आइतबार सार्वजनिक गरेको निर्णयअनुसार अनुशासन संहिताको धारा २७ बमोजिम बालोगुनमाथिको एक खेलको प्रतिबन्ध एक वर्षको परीक्षण अवधिसम्मका लागि स्थगित गरिएको हो। यस निर्णयले उनलाई सोमबार बेल्जियमविरुद्ध हुने नकआउट खेल खेल्ने बाटो खुला गरेको छ।
२५ वर्षीय बालोगुनले बोस्निया एन्ड हर्जगोभिनाविरुद्ध अमेरिकाले २–० को जित हासिल गरेको खेलको ६४औँ मिनेटमा रातो कार्ड पाएका थिए। त्यसअघि भने उनले प्रतियोगितामा तीन गोल गर्दै अमेरिकी टोलीको सफल यात्रामा महत्वपूर्ण योगदान दिएका छन्। निर्णय सार्वजनिक भएपछि ट्रम्पले आफ्नो सामाजिक सञ्जाल ट्रुथ सोसल मार्फत फिफाको कदमको स्वागत गर्दै यसले ठूलो अन्याय सच्याएको प्रतिक्रिया दिएका छन्। तर फिफाको यो निर्णयले नयाँ विवाद पनि निम्त्याएको छ। बेल्जियम फुटबल महासंघले फिफाले अनुशासनसम्बन्धी नियमको गलत व्याख्या गरेको आरोप लगाउँदै निर्णयविरुद्ध अपनाउन सकिने कानुनी विकल्पबारे अध्ययन गरिरहेको जनाएको छ।
अमेरिकी टोली सन् २००२ पछि पहिलो पटक विश्वकपको क्वार्टरफाइनल पुग्ने लक्ष्यसहित मैदान उत्रने तयारीमा छ। अमेरिका र बेल्जियमबीच विश्वकपमा पछिल्लोपटक सन् २०१४ को अन्तिम १६ मा प्रतिस्पर्धा भएको थियो। उक्त खेलमा बेल्जियमले अतिरिक्त समयमा २–१ को जित निकाल्दै अमेरिकाको यात्रा टुंग्याएको थियो। त्यस खेलमा अमेरिकी गोलरक्षक टिम हवार्डले १६ उत्कृष्ट बचाउ गर्दै विशेष चर्चा बटुलेका थिए। बालोगुनलाई खेल्न अनुमति दिएपछि अमेरिकाको क्वार्टरफाइनल पुग्ने सम्भावना थप बलियो बनेको छ। यद्यपि फिफाले गरेको निर्णयको औचित्य र निष्पक्षताबारे भने फुटबल वृत्तमा बहस जारी रहेको छ।
