काठमाडौँ। फिफा विश्वकप २०२६ मा रातो कार्डको संख्या तीव्र रूपमा बढिरहेको देखिएको छ। प्रतियोगितामा हालसम्म ८ खेलाडी मैदानबाट निष्कासित भइसकेका छन्, जुन सन् २०१८ र २०२२ का विश्वकपमा देखाइएका कुल रातो कार्डको संयुक्त संख्यासरह हो।
समूह ‘सी’ अन्तर्गत आइतबार भएको बेल्जियम र इरानबीचको खेलमा बेल्जियमका डिफेन्डर नाथन न्गोयले स्पष्ट गोल अवसर रोक्ने क्रममा फउल गरेपछि ६६औँ मिनेटमा सिधै रातो कार्ड पाएका थिए। त्यसपछि १० खेलाडीमा सीमित बनेको बेल्जियमले इरानसँग गोलरहित बराबरी खेलेको थियो। हालसम्म देखाइएका ८ रातो कार्डमध्ये ६ वटा सिधै रेफ्रीले दिएका छन्। यसले प्रतियोगिताको उच्च प्रतिस्पर्धा र खेलाडीहरूको आक्रामक खेलशैलीलाई झल्काउने विश्लेषण गरिएको छ।
यस विश्वकपमा पाराग्वेका मिगुएल अल्मिरोन, कतारका असिम मादिबो र मोआज अहमद, बोस्निया एन्ड हर्जेगोभिनाका तारिक मुहरामोभिच तथा जमैकाका वार हन्ट पनि रातो कार्ड पाउने खेलाडीको सूचीमा छन्। केही घटनामा भिडियो सहायक रेफ्री (भिएआर)को समीक्षा पछि निर्णय गरिएको थियो। दक्षिण अफ्रिकी टोलीले पनि अनुशासनसम्बन्धी चुनौती सामना गरेको छ। मेक्सिकोविरुद्धको उद्घाटन खेलमा थेम्बा ज्वाने र स्पेफेलो सिथो दुवै रातो कार्ड पाएर मैदान छाड्न बाध्य भएका थिए। विश्वकप इतिहासमा एक संस्करणमा सबैभन्दा धेरै २१ रातो कार्ड सन् २००६ मा देखाइएको थियो। त्यसपछि सन् २०१० मा १७ र सन् २०१४ मा १० खेलाडी निष्कासित भएका थिए। प्रतियोगिता अझै प्रारम्भिक चरणमै रहेकाले यसपटक रातो कार्डको संख्या अझै बढ्न सक्ने अनुमान गरिएको छ।
