काठमाडौँ । कालंगा हाइड्रो लिमिटेडले जेठ ८ गतेदेखि सर्वसाधारणका लागि आईपीओ निष्काशन गर्ने तयारी गरेको छ। यसअघि कम्पनीले आयोजना प्रभावित स्थानीय बासिन्दा र वैदेशिक रोजगारीमा रहेका नेपालीहरूलाई शेयर वितरण गरिसकेको छ।
अब दोस्रो चरणअन्तर्गत कम्पनीले २८ करोड ७० लाख रुपैयाँ बराबरको २८ लाख ७० हजार कित्ता साधारण शेयर सार्वजनिक गर्न लागेको हो। प्रति शेयर १०० रुपैयाँ अंकित मूल्य रहेको यस आईपीओमा न्यूनतम १० कित्ता र अधिकतम २० हजार कित्तासम्म आवेदन दिन सकिने व्यवस्था गरिएको छ। आवेदन अवधि छिटोमा जेठ १३ गतेसम्म रहनेछ भने माग नपुगेमा जेठ २२ गतेसम्म खुला रहनेछ।
कम्पनीको आईपीओलाई केयर रेटिङ्ग नेपालले ‘केयरएनपी डबल बी’ श्रेणीमा मूल्याङ्कन गरेको छ, जसले मध्यम स्तरको जोखिम देखाउँछ। १५।३३ मेगावाट क्षमताको कालंगागाड जलविद्युत आयोजनाबाट कम्पनीले २०७९ माघ २७ गतेदेखि व्यावसायिक उत्पादन सुरु गरिसकेको छ। यस आईपीओको निष्काशन तथा बिक्री प्रबन्धकको रूपमा सानिमा क्यापिटल लिमिटेड रहेको छ। लगानीकर्ताले सी–आस्बा प्रणाली वा ‘मेरो शेयर’ मार्फत सहजै आवेदन दिन सक्नेछन्।
