काठमाडौँ । धरहरा क्षेत्रमा निर्माण भएको संरचनामा सवारी साधन पार्किङ सञ्चालनको व्यवस्थापन काठमाडौँ महानगरपालिकाले गर्ने भएको छ । काठमाडौंको सुन्धरास्थित धरहरा क्षेत्रमा शुक्रबार बसेको नेपाल सरकार र काठमाडौँ महानगरबीच भएको संयुक्त बैठकले धरहरा क्षेत्रमा निर्माण भएको संरचनाभित्र सवारी साधन पार्किङ सञ्चालन तथा व्यवस्थापनलाई थप प्रभावकारी बनाउने र यसका लागि महानगरले महानगर प्रहरी बललाई परिचालन गर्ने निर्णय गरेको हो ।
बैठकले धरहरा क्षेत्रको सञ्चालन गर्नको लागि तत्काल र दीर्घकालीन योजना, परियोजना सञ्चालन, प्रारूप सम्बन्धमा अध्ययन विश्लेषण गरी सुझावसहित पेश गर्न शहरी विकास मन्त्रालय र काठमाडौँ महानगरपालिकाले तोकेका पदाधिकारीको संयुक्त समिति गठन गर्ने निर्णय गरेको छ । धरहराको बाहिरी संरचनाका सम्बन्धमा आवश्यक र उपयुक्त कार्य गर्न काठमाडौँ महानगरलाई जिम्मा दिने निर्णय भएको काठमाडौँ महानगरपालिकाकी कार्यवाहक प्रमुख सुनिता डङ्गोलले जानकारी दिइन । उनले समग्र धरहरा सञ्चालनका लागि पूर्ण रुपमा महानगरलाई हस्तान्तरण गर्न आग्रह गरेकी छन् ।
त्यस्तै शहरी विकास मन्त्री प्राडा कुमार इङ्नामले सुन्धाराको बाहिर स्वरूपको व्यवस्थापन काठमाडौँ महानगरले गर्नेगरी सहमति भएको बताए । यसको सम्पूर्ण आर्थिक दायित्व महानगरले लिने र पार्किङ तथ सुरक्षाको विषय महानगरले तत्कालै अघि बढाउने उल्लेख गरेको छ ।
मन्त्री इङ्नामले महानगरको माग बमोजिम धरहराको पुरै व्यवस्थापन हस्तान्तरणका लागि समिति गठन गरिने र समितिले आवश्यक मोडालिटी तयार गर्ने जानकारी दिएका छन् । छलफलमा गृहमन्त्री ओम प्रकाश अर्याल लगायत अन्य सरोकारवाला निकायका प्रतिनिधिहरूको समेत उपस्थिति रहेको थियो ।
