काठमाडौँ । स्वास्थ्य बीमा बोर्डले स्वास्थ्य बीमाको दुरुपयोग नगरी जिम्मेवार उपयोग गर्न सबै सेवाग्राही तथा सेवा प्रदायकलाई आग्रह गरेको छ । मंगलबार बोर्डले विज्ञप्ति जारी गर्दै बीमा सेवाको दुरुपयोग नगर्न र अनावश्यक परीक्षणहरूका लागि चिकित्सकरस्वास्थ्यकर्मीहरूलाई दबाब नदिन आग्रह गरेको हो ।
विज्ञप्तिमा लेखिएको छ, ‘सामाजिक ऐक्यबद्धता सिद्धान्त अनुरूप सञ्चालन गरिएको यस स्वास्थ्य बीमामार्फत वित्तीय व्यवस्थापन गरी आम नागरिकलाई गुणस्तरीय स्वास्थ्य सेवा उपलब्ध गराउने उद्देश्यका साथ बोर्डले अधिकतम प्रयास गरिरहेको अवस्थामा ‘स्वास्थ्य बीमाको सही सदुपयोग गरौं’ भन्ने सन्देशसहित समस्त सेवाग्राहीहरूले स्वास्थ्य सेवाको जिम्मेवार प्रयोग गर्नुहुन, बीमा सेवाको दुरुपयोग नगर्नुहुन र अनावश्यक परीक्षणहरूका लागि चिकित्सकरस्वास्थ्यकर्मीहरूलाई दबाब नदिनुहुनु अनुरोध गर्दछौं । साथै सेवा प्रदायकहरूले पनि औचित्यका आधारमा मात्र चेकजाँच, ल्याब परीक्षण तथा उपचार प्रचलित कानून तथा बोर्डले निर्माण गरेका निर्देशिका, कार्यविधि तथा परिपत्रको कार्यान्वयन गरी स्वास्थ्य बिमा कार्यक्रमलाई दिगो बनाउन महत्वपूर्ण भूमिका निर्वाह गर्नुहुन अनुरोध गर्दछौं ।’
सीमित स्रोतसाधन र केही संरचनागत चुनौतीका बाबजुद पनि हाल दैनिक करीब ५० हजार नागरिकले स्वास्थ्य बीमामार्फत सेवा लिइरहेको बोर्डले जनाएको छ ।
