काठमाडौँ । डिफेन्डिङ च्याम्पियन बार्सिलोनाले स्पेनिस सुपरकपको फाइनल यात्रा सहज रूपमा तय गरेको छ। बुधबार साउदी अरेबियाको जेद्दामा सम्पन्न सेमिफाइनल खेलमा बार्सिलोनाले एथलेटिको बिलबाओलाई ५–० को फराकिलो अन्तरले पराजित गर्दै अन्तिम चरणमा स्थान सुरक्षित गर्यो।
बार्सिलोनाको जितमा राफिन्हाले दुई गोल गर्दै उत्कृष्ट प्रदर्शन गरे भने फेरान टोरेस, फेरमिन लोपेज र रोनी बारडघाजीले समान एक–एक गोल थपे। खेलको सुरुदेखि नै आक्रामक देखिएको बार्सिलोनाले विपक्षीलाई खेलमा फर्किने कुनै अवसर दिएन। यो जितसँगै बार्सिलोनाको सबै प्रतियोगिता समेट्दा लगातार नवौँ जित भएको छ। अब उसले उपाधिका लागि रियल म्याड्रिड वा एटलेटिको म्याड्रिडमध्ये एकसँग प्रतिस्पर्धा गर्नेछ। गत सिजन बार्सिलोनाले ला लिगा र कोपा डेल रे उपाधिसँगै स्पेनिस सुपरकप पनि जितेको थियो, र यसपटक पनि टोली उपाधि जोगाउने लक्ष्यसहित फाइनलमा प्रवेश गरेको छ।
