काठमाडौं - मलेसिया पुगेको नेपाल प्रहरीको टोलीले गृहमन्त्री रमेश लेखकसमक्ष सहकारी ठगी प्रकरणका आरोपी जीबी राईलाई नेपाल ल्याउन नसक्नुको कारण ब्रिफिङ गरेको छ। प्रहरी महानिरीक्षक (आईजीपी) वसन्तबहादुर कुँवर सहित मलेसियामा गएका प्रहरी उपरीक्षक (एसपी) समेतको टोलीले यो जानकारी दिएको हो।
रवी लामिछानेकै कारण समस्या
प्रहरीको भनाइ अनुसार, पूर्वगृहमन्त्री रवी लामिछानेकै कारण राईलाई फिर्ता ल्याउन समस्या भएको छ। लामिछानेले उपप्रधानमन्त्री एवं गृहमन्त्री हुँदा मलेसियाका गृहमन्त्रीसँग टेलिफोन कुराकानी गरी जीबी राईलाई फिर्ता पठाउन आग्रह गरेका थिए। लामिछानेले सिधै उच्च तहमा कुरा गरेपछि यो विषय प्रहरीको नियन्त्रण बाहिर पुगेको प्रहरी स्रोतले जानकारी दिएको छ।
एनसीबी मलेसियासँगको समन्वय
नेपाल प्रहरीको टोलीले क्वालालम्पुरमा अन्तर्राष्ट्रिय अपराध प्रहरी संगठन (इन्टरपोल) को नेशनल कन्ट्रोल ब्यूरो (एनसीबी) का अधिकारीहरुसँग भेटघाट गरेको थियो। मलेसियाका एनसीबी अधिकारीहरुले यो विषय मन्त्रीस्तरमा पुगेकाले उनीहरु केही गर्न नसक्ने बताएको नेपाल प्रहरीले जानकारी दिएको छ।
सन्धि नहुँदा समस्या
मलेसियासँग पारस्परिक कानूनी सहायता सन्धि नहुँदा पनि जीबी राईलाई फिर्ता ल्याउन समस्या भएको हो। नेपालका उच्च प्रहरी अधिकारीले भारत र चीनसँग कानूनी सहयोग हुने सन्धि भएकाले त्यहाँ सहयोग हुने तर मलेसियामा यस्तो व्यवस्था नहुँदा राईलाई ल्याउन कठिन भएको बताएका छन्।
जीबी राईको लोकेशन
प्रहरी टोलीको जानकारी अनुसार, राई मलेसिया र सिंगापुरको सीमा नजिक एक टापुमा बसिरहेको सूचना प्राप्त भएको छ। तर, उनीलाई फिर्ता ल्याउन परिस्थिति अनुकूल नभएकाले थप रेकी गर्न नसकिएको स्रोतले बताएको छ।
डिपोर्ट गर्न प्रयास जारी
जीबी राईलाई डिपोर्ट गराउन नेपाल प्रहरीले विभिन्न कानूनी प्रक्रिया अघि बढाएको छ। इन्टरपोलको रेड नोटिस जारी भए पनि राईलाई डिपोर्ट गर्न नेपाल र मलेसियाबीच सन्धिको अभावले समस्या खडा भएको हो। साथै, प्रहरीको आग्रहमा अदालतले राहदानी रोक्का गर्न अस्वीकार गरेपछि पनि फिर्ता ल्याउने प्रक्रिया कठिन भएको छ।
संगठित अपराधमा मुद्दा
सहकारी ठगीका कारण पीडितलाई न्याय दिलाउन राईविरुद्ध संगठित अपराधमा मुद्दा लैजाने सरकारी तयारी छ। यसले राईलाई डिपोर्ट गराउने प्रक्रिया चाँडो हुने अपेक्षा गरिएको छ।
