पोखरा - प्रत्येक वर्ष आयोजना हुँदै आएको मिस मगर नेपाल २०२४ को शिर्ष प्रायोजन यस वर्ष निट डेन्टल केयर प्रालिले गर्ने भएको छ। सातौं संस्करणको प्रायोजनको घोषणा कार्यक्रमका टिम संयोजक प्रियन्का गर्बुजा मगरले बिहीवार जानकारी दिइन्।
प्रायोजन सम्झौतामा हस्ताक्षर
मिस मगर नेपालको शिर्ष प्रायोजन सम्झौता पत्रमा आज निट डेन्टल केयर प्रालिका निर्देशक बिरबहादुर राना (विरेन्द्र) र मिस मगर नेपालका कार्यक्रम निर्देशक सुरज थापामगरले हस्ताक्षर गरे। यस सम्झौताले प्रतियोगितालाई थप सशक्त बनाउँदै, मिस मगर नेपाल २०२४ लाई निट डेन्टल केयर प्रालिको समर्थन प्राप्त हुनेछ।
प्रतिस्पर्धीहरूको छनोट र तयारी
सातौं संस्करणको मिस मगर नेपाल प्रतियोगितामा प्रारम्भिक चरणमा २० जना प्रतिस्पर्धीहरू भाग लिएका थिए, जसबाट हाल ११ जना प्रतिस्पर्धीहरू फाइनल चरणमा प्रवेश गरेका छन्। टिम संयोजक प्रियन्का गर्बुजा मगरका अनुसार यी प्रतिस्पर्धीहरूलाई विभिन्न प्रकारका तालिमहरू दिइरहेका छन्।
फाइनल चरणमा प्रवेश गरेका प्रतिस्पर्धीहरू
- दिपिका आले मगर (रामेछाप)
- आशिका गर्बुजा मगर (म्याग्दी)
- अनुजा पुन मगर (बागलुङ)
- नरिशा पुन मगर (म्याग्दी)
- सरिता थापामगर (रामेछाप)
- माया दर्लामी मगर (स्याङ्जा)
- रश्मि आले मगर (महोत्तरी)
- जानकी राजकोटी मगर (महोत्तरी)
- अस्मिता बुढा मगर (रोल्पा)
- कृष्टिना पुन मगर (म्याग्दी)
- जेरुशा सारु मगर (काठमाडौं)
प्रशिक्षण र तयारी
फाइनल चरणमा पुगेका यी प्रतिस्पर्धीहरूलाई हाल मातृभाषा, कला, र संस्कृतिहरू बारे विभिन्न तालिमहरू दिइरहेका छन्। प्रशिक्षण कार्यक्रम नेपाल आदिवासी जनजाति पत्रकार महासंघ (फोनिज) गण्डकीका अध्यक्ष रुद्र श्रीसमगरले नेतृत्व गर्दै छन्। साथै, प्रतिस्पर्धीहरूलाई नेतृत्व विकास, भेषभुषा, कला, र संस्कृति लगायतका विविध तालिमहरू समेत प्रदान गर्दै आएको आयोजकले जनाएको छ।
ग्राण्ड फिनालेको तयारी
मिस मगर नेपालको सातौं संस्करणको ग्राण्ड फिनाले यस वर्ष भदौ २२ गते होटल पोखरा ग्राण्डमा आयोजना गरिने भएको छ। यस कार्यक्रमको मिडिया पाटर्नरहरूमा फेवा टेलिभिजन, सुनगाभा न्यूज, र मगर संसार फोटो ग्यालरी रहेका छन्।
