बाजुरा जिल्लाको हिमाली गाउँपालिका–३ बौडीस्थित गोरु खर्कमा शनिबार बिहान आएको पहिरोमा चारजना घाइते भएका छन्।
पहिरोका कारण प्रेमकला बुढा, ललिता बुढा, अगौठी रोकाया, र हंस बुढा घाइते भएको जानकारी वडा नं ३ का वडाध्यक्ष मङ्गल बुढाले दिएका छन्।
घटनास्थलमा ३० परिवारको बसोबास रहेको र पशुचौपाया पनि पुरिएको भए तापनि विस्तृत विवरण भने अझै सङ्कलन हुन बाँकी रहेको वडाध्यक्ष बुढाले बताएका छन्। स्थानीयवासीले मिलेर घाइतेहरूको उद्धार गरेका छन्।
जिल्ला प्रहरी कार्यालयले घटनास्थलमा प्रहरीको उद्धार टोली पठाइसकेको छ। जिल्ला प्रहरी कार्यालयका सूचना अधिकारी रवीन्द्रसिंह कार्कीका अनुसार उद्धार टोलीले यकिन विवरण सङ्कलन गरेपछि थप जानकारी उपलब्ध गराइनेछ।
यहाँको परिस्थिति थप खराब हुन सक्ने भएकाले स्थानीयलाई सतर्क रहन आग्रह गरिएको छ।
