काठमाडौं - एयर डाइनेष्टीको हेलिकप्टर दुर्घटनामा मृत्यु भएका चार जना चिनियाँ नागरिकहरु नेपाल आउनुको कारणबारे जानकारी प्राप्त भएको् छ।
बिहिबार सञ्चार तथा सूचना प्रविधि मन्त्री पृथ्वी सुब्बा गुरूङले दुर्घटनामा ज्यान गुमाएका चिनिया नागरिकहरु नेपालमा लगानीका अवसरहरूको खोजीमा आएको जानकारी दिएका छन्।
मन्त्रीको टिप्पणी
सिंहदरबारमा बिहीबार मन्त्रीले मन्त्रिपरिषदको निर्णय सार्वजनिक गर्दै भने, “हिजो चिनियाँ टोलीहरू घुम्नको लागि आएको होइन, उनीहरू लगानीका क्षेत्र अवलोकन गर्न आएका देखिन्छन्। यसले विदेशी लगानी प्रभावित हुनसक्छ।” उनले भने, “हाम्रो आकाश सुरक्षित छैन, हाम्रो एयरलाइन्स र हेलिकप्टरहरू सुरक्षित छैनन् भन्ने कुरा देखाउँछ।”
समग्र समस्या र समाधानको प्रक्रिया
मन्त्रीले बारम्बार हुने जहाज र हेलिकप्टर दुर्घटनाहरूले पर्यटन क्षेत्र मात्र होइन, अन्तर्राष्ट्रिय लगानीमा पनि असर पुर्याउने बताएका छन्। यस समस्याको समाधानका लागि नीतिगत सुधार गर्ने प्रक्रिया जारी रहेको जानकारी दिएका छन्। कानुनी त्रुटिहरू र नियामक संस्थाहरूको भूमिका बारेमा छलफल भइरहेको पनि उनले बताएका छन्।
दुर्घटनाबारे थप विवरण
बुधबार रसुवाको स्याफ्रुबेसीका लागि उडेको हेलिकप्टर नुवाकोटको शिवपुरी गाउँपालिका वडा नम्बर ७ सूर्यचौरमा दुर्घटना भएको थियो। दुर्घटनामा पाइलट अरूण मल्लसहित पाँच जनाको मृत्यु भएको छ। मृत्यु हुनेमा चार जना चिनियाँ नागरिक—टाङ जुटाओ, वु यियाओ, ली जेई र सेइ जिमिङ रहेका छन्।
सरकारले हेलिकप्टर दुर्घटनाको छानबिन गर्न समिति समेत गठन गरेको छ।
