काठमाडौं - संस्कृति, पर्यटन तथा नागरिक उड्डयन मन्त्रालयले १५ दिनको अवधिमा दुईवटा हवाई दुर्घटना भएकोमा चिन्ता व्यक्त गर्दै हवाई सुरक्षालाई उच्च प्राथमिकतामा राख्ने घोषणा गरेको छ।
मन्त्रीको प्रतिबद्धता
संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले बुधबार राति एक विज्ञप्ति जारी गर्दै आगामी एक साता हवाई सुरक्षाका विषयमा केन्द्रित हुने प्रतिबद्धता व्यक्त गरेका छन्। उनले अतिजरुरीबाहेक सबै पूर्वनिर्धारित कार्यक्रम स्थगन गर्ने निर्णय गरेका छन्।
तात्कालिक, मध्यकालीन, दीर्घकालीन सुधारका पहल
मन्त्री पाण्डेले हवाई सुरक्षालाई उच्चतम प्राथमिकतामा राखेर आजैदेखि तात्कालिक, मध्यकालीन, र दीर्घकालीन सुधारका पहल थालनी गरिएको बताएका छन्। यस निम्ति आवश्यक कदम चाल्न मन्त्रालय र माताहतका निकायलाई परिचालन गरिने छ।
नुवाकोटको हेलिकप्टर दुर्घटना
बुधबार नुवाकोटको शिवपुरी गाउँपालिका–७ सूर्यचौरमा एयर डाइनोस्टीको हेलिकप्टर दुर्घटना हुँदा पाइलट अरुण मल्लसहित चारजना चिनियाँ नागरिकको मृत्यु भएको थियो।
सुझावको अपेक्षा
मुलुकको उड्डयन क्षेत्रले भोग्नुपरेका समस्या र समाधानका लागि मन्त्रालयले सबैको साथ, सहयोग र सुझावको अपेक्षा गरेको छ। मन्त्रालयले तत्काल र दीर्घकालमा चाल्नुपर्ने कदमबारे सुझाव दिन अनुरोध गरेको छ।
पर्यटनमन्त्री पाण्डेले दुर्घटनामा ज्यान गुमाएकाहरूप्रति श्रद्धाञ्जली प्रकट गर्दै शोकाकूल परिवारजनमा समवेदना व्यक्त गरेका छन्।
