पोखरा। नेकपा एकीकृत समाजवादीका अध्यक्ष माधवकुमार नेपालले राष्ट्रपति एमालेबाटै भए देश बर्बाद हुने बताएका छन्।
बुधबार पोखरामा समाजवादी प्रेस संगठन कास्कीले आयोजना गरेको पत्रकार भेटघाट कार्यक्रममा उनले राष्ट्रपति एमालेबाटै भए देश बर्बाद हुने बताएका हुन्।
उनले सभामुख र राष्ट्रियसभा अध्यक्ष पनि एमालेकै रहेकोले राष्ट्रपति पनि एमालेबाटै भए त देश बर्बाद हुने दाबी गरे। नेपालले शक्ति सन्तुलनका हिसाबले पनि एमालेलाई राष्ट्रपति दिन नहुने बताए।
सभामुख र राष्ट्रिय सभाका अध्यक्ष नेकपा एमालेबाटै भएको अवस्थामा राष्ट्रपति समेत एमालेलाई नै दिँदा शक्ति सन्तुलन गुम्ने र देशमा अस्थिरता पैदा हुने तर्क नेपालको छ। देशमा राजनीतिक स्थायित्व कायम गर्न तथा संविधानको रक्षा गर्नका लागि राष्ट्रपतिमा सहमति हुनुपर्ने जिकिर गर्दै अध्यक्ष नेपालले त्यस्तो राष्ट्रपति राजनीतिक वा गैरराजनीतिक दुवै हुन सक्ने बताए ।
नेपालले अहिले सत्ता गठबन्धन संविधान, गणतन्त्र, संघीयताप्रति प्रतिबद्ध नरहेको र खिचडी गठबन्धन भएको टिप्पणी गरे।
उनले राष्ट्रिय सहमतिविना राष्ट्रपति पदमा उम्मेदवारी नदिने बताए।
