काठमाडौँ, २१ माघ – दुई सय ५० उद्योगबाट उत्पादित तीन सय ६९ सामग्रीलाई गुणस्तर तथा नापतौल विभागले नेपाल गुणस्तर चिह्न (एनएस) प्रदान गरेको छ।
गुणस्तर तथा नापतौल विभागले स्वदेश तथा विदेशमा उत्पादन भएका उद्योगका उत्पादित वस्तुलाई नेपाल गुणस्तर चिह्न प्रदान गरेको जानकारी दिएको हो।
दर्ता र गुणस्तर पुर्याएर विभागमा निवेदन दिएका उद्योगलाई उत्पादित वस्तुको गुणस्तर हेरेर एनएस चिह्न प्रदान गरिएको जानकारी विभागका महानिर्देशक विश्वबाबु पुडासैनीले दिएका छन्।
धेरै उद्योगबाट उत्पादित वस्तुलाई एनएस चिह्न प्रदान गरेपनि कतिपय उद्योगले नवीकरण नगरेको पुडासैनीले बताए।
गुणस्तर चिह्न प्राप्त गर्नेमा ७१ सिमेन्ट उद्योगबाट उत्पादित १३५ वस्तु, २५ डण्डी उद्योगबाट उत्पादित २५ वस्तु, २३ पिभीसी केवल उद्योगबाट उत्पादित २३ वस्तु, १० एलपीजी उद्योगबाट उत्पादित १० वस्तु, १३ पिभीसी पाइप उद्योगबाट उत्पादित १३ वस्तु र २९ एचटिपिई पाइप उद्योगबाट उत्पादित २९ वस्तु रहेका छन्।
नेपाल गुणस्तर चिह्न प्राप्त गर्ने सिमेन्ट उद्योगमा ६३ ओपीसी, १४ पीएससी र ५८ पीपीसी रहेका छन्। विभागले गत वर्षदेखि विदेशमा उत्पादित वस्तुलाई पनि एनएस चिह्न दिन शुरु गरेको छ।
विभागले भारतमा उत्पादित नौ उद्योगका १४ वस्तु र चीनमा उत्पादित एक उद्योगको एक वस्तुलाई एनएस चिह्न प्रदान गरेको छ।
पुडासैनीले चालु आर्थिक वर्षमा १६ उद्योगबाट उत्पादित १९ वस्तुलाई एनएस चिह्न प्रदान गरेको जानकारी दिएका छन्।
