काठमाडौँ । एमालेका प्रमुख सचेतक ऐन महरले राष्ट्रिय स्वतन्त्र पार्टी (रास्वपा)को पहिलो महाधिवेशनलाई लिएर कडा टिप्पणी गरेका छन्। उनका अनुसार महाधिवेशनको व्यवस्थापन र सहभागिताको ढिलासुस्तीले पार्टीको नेतृत्वको क्षमता र परिपक्वतामाथि प्रश्न उठाएको छ।
उनले १४२ सिट जितेको दाबी गर्ने पार्टीको महाधिवेशनमा प्रधानमन्त्रीसहित चर्चित व्यक्तिहरूको उपस्थिति र १०–१२ हजारको भीडलाई मात्रै ठूलो उपलब्धि मान्न नसकिने बताए। सामाजिक सञ्जालको लोकप्रियता वा ‘फेसबुक फ्यान फलोअर्स’ का आधारमा मात्र पार्टी चलाउन नसकिने उनको भनाइ छ। महरले चार हजारभन्दा बढी प्रतिनिधि सहभागी भएको महाधिवेशन सात दिनसम्म पनि पूरा हुन नसक्नु कमजोर व्यवस्थापनको संकेत भएको दाबी गरे। उनका अनुसार यस्तो ढिलासुस्तीले प्रत्यक्ष रूपमा जनताका कामसमेत प्रभावित भएका छन्।
उनले निर्वाचन प्रक्रिया समयमै पूरा गर्न नसक्ने र अलोकतान्त्रिक शैली अपनाउने नेतृत्वले देश चलाउन सक्दैन भन्दै आलोचना गरे। निर्णय क्षमतामा कमजोरी र हचुवाको भरमा काम गर्ने प्रवृत्तिले पार्टीको विश्वसनीयतामाथि प्रश्न उठेको उनको तर्क छ। समग्रमा उनले रास्वपाले पुरानो राजनीतिक शैलीलाई नै नयाँ रूपमा प्रस्तुत गर्न खोजेको आरोप लगाउँदै, हालको कार्यशैलीले पार्टीको भविष्य र नेतृत्व क्षमताबारे गम्भीर शंका उत्पन्न गरेको बताएका छन्।
