काठमाडौँ । नेपाली कम्युनिस्ट आन्दोलनमा एकता र पुनर्गठनको आवश्यकता रहेको नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले बताएका छन्।
स्वर्गीय नेता निर्मल लामाको २६औँ स्मृति सभामा बोल्दै उनले कम्युनिस्ट कार्यकर्ताहरूबीच एकताको चाहना व्यापक भए पनि नेतृत्व तहका प्रयासहरू दीर्घकालीन रूपमा सफल हुन नसकेको उल्लेख गरे। प्रचण्डका अनुसार एकतालाई दिगो बनाउन वैचारिक छलफल, संगठनात्मक नीति र विधिको विकास आवश्यक छ, जुन अहिलेसम्म पर्याप्त रूपमा हुन नसकेको उनले बताए। उनले कम्युनिस्ट आन्दोलन विभाजन र एकताको विभिन्न चरण हुँदै अघि बढेको उल्लेख गर्दै अहिले पनि एकताको आवश्यकता झन् बढेको धारणा राखे। कार्यक्रममा उनले देशमा विदेशी पूँजी र शक्तिहरूको प्रभाव बढ्दै गएको दाबी गर्दै हालको राजनीतिक अवस्था चुनौतीपूर्ण रहेको टिप्पणी गरे। उनले कम्युनिस्ट आन्दोलनलाई कमजोर बनाउने प्रयास भइरहेको भन्दै त्यसको अध्ययन र अनुसन्धान आवश्यक रहेको पनि बताए। प्रचण्डले आत्मसमीक्षामार्फत कमजोरी सच्याएर कम्युनिस्ट आन्दोलनलाई नयाँ ढंगले अघि बढाउनुपर्ने आवश्यकता रहेको जोड दिए।
