काठमाडौँ । संवैधानिक परिषद्को बिहीबार बसेको बैठकले सर्वोच्च अदालतको प्रधानन्यायाधीश पदका लागि न्यायाधीश डा. मनोजकुमार शर्माको नाम सिफारिस गरेको छ। न्यायपरिषद्ले यसअघि पठाएका ६ जना योग्य उम्मेदवारहरूको सूचीबाट शर्माको नाम चयन गरिएको हो।
संवैधानिक परिषद्को यो सिफारिस अब संसदीय सुनुवाइ समितिमा पठाइनेछ। संसदीय सुनुवाइ समितिले डा. शर्माको नाम अनुमोदन गरेपछि मात्र राष्ट्रपतिबाट उनलाई प्रधानन्यायाधीश नियुक्त गरिने संवैधानिक व्यवस्था छ।
२०७६ साल वैशाखमा सर्वोच्च अदालतको न्यायाधीश नियुक्त भएका डा. शर्माले प्रधानन्यायाधीशको जिम्मेवारी सम्हालेमा करिब ६ वर्षसम्म न्यायपालिकाको नेतृत्व गर्नेछन्। यसलाई सर्वोच्च अदालतको इतिहासमा पछिल्लो समयकै लामो कार्यकाल मध्येको एक मानिएको छ।
