काठमाडौँ । काठमाडौँ महानगरपालिकाले सडक किनारामा गमलामा राखेर फूल फुलाउन थालेको छ ।
पार्क तथा हरियाली प्रवर्धन आयोजनाले ‘गौरव योजना मेरो रहर, सुन्दर र हरित सहर’ कार्यक्रम अन्तर्गत गमलामा फूल राख्न थालिएको हो । आयोजनाका इन्जिनियर सरकारदीप श्रेष्ठका अनुसार अहिले सिंहदरबार अगाडिको भागमा वेगमवेली जातका फूल रोपिएका हुन् ।
यो फूल पहेँलो, रातो, गुलावीलगायत रङमा फुल्छ । फूल फुलाउने कार्यलाई नियमित गराउन गमलाहरू सिमेन्टका राखिएका छन् ।
किनाराका स्थायी ठुला सिमेन्टका गमलामा बिरुवा लगाउने, फूल राेप्ने, गोडमेल गर्ने तथा पानी हालेर हुर्काउन वातावरण व्यवस्थापन विभागले काम गरिरहेको छ । यसपछि भित्री सहरी क्षेत्रमा गमला राख्दै लगिने योजना रहेको श्रेष्ठको भनाइ छ ।
