काठमाडौँ। सोपान फर्मास्यूटिकल्स लिमिटेडले सर्वसाधारणका लागि निष्काशन गर्न लागेको प्राथमिक शेयर (आईपीओ) को मिति संशोधन गरेको छ। कम्पनीले बैशाख २ गतेदेखि आवेदन खुला गर्ने योजना गरेको भए पनि शनिबार र आइतबार सार्वजनिक बिदा हुने भएकाले अब बैशाख ३ गतेदेखि आवेदन खुला हुने जानकारी दिएको छ।
कम्पनीको कुल जारी पूँजी १ अर्ब ७१ करोड ६० लाख रुपैयाँमध्ये २५ प्रतिशत शेयर ४२ लाख ९० हजार कित्ता वैदेशिक रोजगारीमा रहेका नेपाली, कर्मचारी र सामूहिक लगानी कोषका लागि बाँडफाँट गरिसकिएको छ। बाँकी ३४ लाख ७४ हजार ९०० कित्ता शेयर प्रतिकित्ता १०० रुपैयाँ अंकित दरमा सर्वसाधारणका लागि बिक्री खुला हुनेछ। आईपीओमा न्यूनतम १० र अधिकतम ११ हजार कित्ता शेयरका लागि आवेदन दिन सकिनेछ। आवेदन अवधि छिटोमा बैशाख ८ गतेसम्म रहनेछ भने मागअनुसार लम्बाइ आवश्यक परे बैशाख १७ गतेसम्म विस्तार गर्न सकिने कम्पनीका बिक्री प्रबन्धक एनएमबि क्यापिटल लिमिटेडले जानकारी दिएका छन्। इच्छुक लगानीकर्ताले नेपाल धितोपत्र बोर्डबाट अनुमति प्राप्त बैंक तथा वित्तीय संस्था, साथै ‘मेरो शेयर’ अनलाइन पोर्टल र एपमार्फत सि–आस्बा प्रणाली प्रयोग गरी आवेदन दिन सक्नेछन्।
