काठमाडौँ । हवाई इन्धनको मूल्य बढेसँगै अष्ट्रेलिया र न्युजिल्यान्डबीचका उडानहरू प्रभावित भएका छन्। जेटस्टार एयरवेज को न्युजिल्यान्ड इकाइले मध्यपूर्व क्षेत्रमा जारी द्वन्द्वका कारण इन्धन महँगिएको उल्लेख गर्दै आफ्ना केही आन्तरिक तथा अन्तरदेशीय उडानहरू रद्द गरेको जनाएको छ।
कम्पनीका अनुसार मे महिनामा करिब १२ प्रतिशत उडान प्रभावित हुनेछन्। यसको प्रभाव अकल्यान्ड, क्राइस्टचर्च, वेलिङ्टन, सिड्नी र ब्रिसबेनबीच सञ्चालन हुने उडानहरूमा परेको छ। प्रभावित यात्रुहरूलाई सम्भव भएसम्म वैकल्पिक उडानको व्यवस्था गरिएको कम्पनीले जानकारी दिएको छ। कम्पनीका प्रवक्ताका अनुसार बढ्दो इन्धन मूल्यका कारण तालिकामा अस्थायी परिवर्तन गर्नुपरेको हो। यात्रुहरूलाई परेको असुविधाप्रति कम्पनीले क्षमायाचना पनि व्यक्त गरेको छ। यसैबीच, भियतनाम एयरलाइन्स ले पनि इन्धनको मूल्य र उपलब्धतामा समस्या देखिएपछि साप्ताहिक रूपमा करिब दुई दर्जन आन्तरिक उडानहरू रद्द गरेको जनाएको छ।
