काठमाडौँ । प्रहरी महानिरीक्षक दान बहादुर कार्कीले नेपालमा बढ्दो महिला तथा बालबालिकामाथिको हिंसा अत्यन्त गम्भीर चासोको विषय बनेको भन्दै यसको न्यूनीकरणका लागि सबै सरोकारवाला निकायको सामूहिक अभियान अपरिहार्य भएको टिप्पणी गरेका छन् । ‘प्रविधिको सही प्रयोग गरौं लैङ्गिक हिंसा अन्त्य गरौं’ राष्ट्रिय नारा सहित आइतबार नेपाल प्रहरी प्रधान कार्यालयमा आयोजित १६ दिने लैङ्गिक हिंसा विरुद्धको अभियानसँग सम्बन्धित विशेष समारोहलाई सम्बोधन गर्दै उनले लैङ्गिक हिंसा व्यक्तिगत घटना मात्र नभई परिवार, समाज र राष्ट्रकै विकासमा असर पार्ने गम्भीर अपराध भएको बताएका छन् ।
सो अवसरमा आर्थिक वर्ष २०८१/८२ को लैङ्गिक हिंसासम्बन्धी वार्षिक तथ्यपत्र सार्वजनिक गर्दै महानिरीक्षक कार्कीले हिंसा न्यूनीकरणका क्षेत्रमा उल्लेखनीय योगदान गर्ने प्रहरी कर्मचारीहरूलाई प्रशंसापत्र तथा नगद पुरस्कारसमेत प्रदान गरेका छन् । उनले लैङ्गिक हिंसा बहुआयमिक समस्या भएकोले यसको समाधान पनि बहुआयमिक सहकार्य, प्रभावकारी अनुसन्धान र पीडितमैत्री सेवाबाट मात्रै सम्भव हुने उल्लेख गर्दै विभिन्न राष्ट्रिय तथा अन्तर्राष्ट्रिय निकायहरूको निरन्तर सहयोगबापत धन्यवाद व्यक्त गरेका छन् । साथै, १६ दिने अभियान वर्षमा एकपटक सीमित नहुने र वर्षभरि निरन्तर सक्रियता आवश्यक हुनेमा पनि उनले जोड दिएका छन् ।
प्रहरी प्रमुख कार्कीले पछिल्लो समय एआइ र डिजिटल प्रविधिको दुरुपयोगबाट हिंसाका नयाँ चुनौती देखिएको उल्लेख गर्दै नेपाल प्रहरीले ‘शून्य सहनशीलता को नीतिअनुसार संघसंस्था, शैक्षिक संस्था, स्थानीय तह र महिला समूहसँग सहकार्य गर्दै निरन्तर सचेतनामूलक कार्यक्रम सञ्चालन गरिरहेको जानकारी दिएका छन्। कार्यक्रममा गृहमन्त्रालय, महिला तथा बालबालिका मन्त्रालय, राष्ट्रिय महिला आयोग, युनिसेफ लगायतका प्रतिनिधिहरूले समेत लैङ्गिक हिंसा नियन्त्रणका लागि साझा प्रतिबद्धता व्यक्त गरेका थिए। समारोहमा वरिष्ठ प्रहरी अधिकारी, सञ्चारकर्मी तथा विभिन्न सरकारी–गैरसरकारी संस्थाका प्रतिनिधिहरूको भौतिक तथा भर्चुअल उपस्थिति रहेको थियो।
