काठमाडौं । नेपाल प्रिमियर लिग (एनपीएल) को दोस्रो सिजन अन्तर्गतको शनिबारको खेलमा ओपनर मार्क वाटको शतकमा कर्णाली याक्सले लुम्बिनी लायन्सलाई ९ विकेटले पराजित गरेको छ ।
कर्णालीलाई सिजनको पहिलो जित दिलाउन कर्णालीका वाटले ४४ बलमा अविजीत ११४ रन प्रहार गरे । वाट जारी सिजनमा पहिलो शतक हान्ने खेलाडी बनेका छन् । जारी सिजनको सार्वधिक रन स्कोरर पनि उनी बनेका छन् ।
मार्कले आफ्नै टिमका अर्का ओपनर प्रियाङ्क पञ्चालको रकेर्ड तोडेका हुन् । प्रियाङ्कले सिजनको दोस्रो र टिमको पहिलो खेलमा चितवन राइनोजविरुद्ध ४८ बलमा ९० रन बनाएर आउट भएका थिए ।कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा टस हारेर पहिले ब्याटिङ गरेको लुम्बिनीले १५७ रनको लक्ष्य दिएपछि जवाफी ब्याटिङ गरेको कर्णालीले १२ ओभरको दोस्रो बलमै लक्ष्य पूरा गरेको हो ।
कर्णालीले १ विकेटको क्षतिमा १६१ रन बनायो ।
कर्णालीलाई जिताउन विलियम विसिस्टोले २० बलमा २ चौका र १ छक्काको सहयोगमा २९ रन जोडे । ओपनर प्रियाङ्क पञ्चालको ब्याटिङ भने चलेन । उनले १० बल खेल्दा १ चौका र १ छक्काको सहयोगमा १२ रन जोडे ।
कर्णालीले यस सिजनमा आफ्नो दोस्रो खेलमा पहिलो जित भेट्टाएको छ । ब्याटिङतर्फ यो जितको जस मार्क वाटलाई जान्छ । यस खेलमा लुम्बिनीको बलिङ फितलो बन्यो । कर्णालीको एक मात्रै विकेट लिने लुम्बिनीका खेलाडी शेर मल्ल हुन् । तीन ओभर बलिङ गर्दा उनले २९ रन खर्चेर कर्णालीका ओपनर प्रियाङ्कको विकेट लिए ।
लुम्बिनीबाट कप्तान रोहितले सबैभन्दा खर्चिलो बलिङ गरे । उनले २ ओभर बलिङ गर्दा ३८ रन खर्चिए । त्यसपछिका खर्चिला बलर जेजे स्मिट हुन । उनले १ ओभर बलिङ गर्दा १७ रन खर्चिए ।
डी आर्सी सर्ट पनि लुम्बिनीका खर्चिला बलर हुन् । उनले १ ओभर २ बल बलिङ गर्दा २३ रन खर्चिए । गुलबदिन नैबले २ ओभर बलिङ गर्दा २५ रन र अविषेक गौतमले १ ओभर बलिङ गर्दा १२ रन खर्चिए ।
